GI-KNOCKOUT sulod lang sa first round si Romero Duno sa Mexican-American fighter nga si Ryan Garcia sa ilang regional title fight, Dominggo, Nobiyembre 3, didto sa Las Vegas, Nevada, Ang oras 1:38 segundos.
Daw sa wala paningta si Garcia sa maong kadaugan nga naghatag kaniya sa bakanting World Boxing Council (WBC) Silver ug World Boxing Organization (WBO) NABO lightweight titles.
Sa sayo pa lang bahin sa maong round, agresibo kaayong miataki si Duno apan nahilam-os usab siya sa kombinasyon sa mga kumo nga gipanglabay ni Garcia ngadto sa iyang ulo ug nawong.
Usa ka solidong right straight nga mitaroy sa apapangig maoy mihatod ni Duno sa kanbas ug wala na kini makabangon pa sulod sa pipila ka minutos.
Si referee Tony Weeks wa maglangan ug dali kini miwara-wara sa iyang kamot timaan nga dili na mahimo pang ipadayon ang away.
Ang bag-ong regional champion nga si Garcia, nagbase sa Victorville, California, pabilin nga wala pa makatilaw og kapildihan ug nipasaka sa iyang record ngadto sa 19W-0L, 16KO samtang si Duno nadakin-as sa 21-2, 16KO nga record.
Ang Duno-Garcia fight maoy top supporting main event sa Mexican Saul “Canelo” Alvarez vs Russian Sergey “Krusher” Kovalev nga gidalit sa Golden Boy Promotions.
Sa maong away, si Alvarez nagkinahanglan pa og 11 ka rounds aron pag-knockout ni Sergey Kovalev sa ilang 12-round world title fight. Ang left-right combination maoy nga niresulta sa pagkatumba ni Kovalev sa 2:15 sa 11th round maoy nakapaaghat ni referee Russell Mora sa pag-undang sa away.
Si Duno maoy ikaduha nga boxers sa SanMan Promotions nga napildi sa Amerika. Sa miaging semana, napildi si Butuan City, Agusan del Norte native Mark “Machete” Bernaldez batok kang Andy Vences pinaagi sa unanimous decision didto sa Reno, Nevada.
Hinuon ang laing sakop sa SanMan Promotions nga si Mike “Magic” Plania midaug sa miaging semana usab batok Nicaraguan Julio Buitrago pinaagi sa TKO sa ikaupat nga round sa Miami Florida. (Daniel Quindao Guden, US Correspondent)