SA MIAGING semana, namatikdan ang pagbaha sa mga sakyanan padung sa nagkadaiyang destinasyon gikan sa mga dakbayan sa Metro Cebu area.
Nisamot ang ilang gidaghanon nianang pagka Huwebes bisperas sa Kalag Kalag. Gawas sa mga bus, mga pribadong sakyanan nga gisakyan og mga bakasyonista akong namatikdan.
Sa ato pa nagsagul ang pagbaha sa mga tawo padung sa mga probinsiya.
Dunay managkot ug ang uban magpalabay sa mga adlaw nga way trabaho sa mga dapit nga nindot bakasyonan. Daghan nila nagdala og ilang sakyanan.
Unyag pamalik ning maong mga tawo, ipuno pa nimo tong mga way sakyanan, magsinardinas ang sitwasyon sa karsada.
Mao nay makapa high blood nga kasinatian sa trapiko nga nag-aginod kay nag-abot ang mga nanguli. Hinuon may tambag ang mga suheto. Sa sunod nimong biyahe ayaw og apil sa panon. Kon nagmaneho ka og sakyanan pangadlawon.
Ayaw og biyahe sa adlawan. Pwede sab nga ari naka sa lawom nga kagabhion mobiyahe. Mao nay sekreto nga mahimong i-apply sa mga panahon nga tingpauli.
Risgo lang niadtong magdrayb nga may problema sa panan-aw ug sa mga nakainom basin magduka ug makatulog.
Risgo sab sa mga sakyanan nga kulang sa power basin maaberya way matuktok nga shop tungod sa kamingaw.
Duna pay daghan hinuon nga wa pa manguli kay gustong molikay sa trapik. Hinuon ang uban nga nakahukom nga mo-absent karong adlawa sa ilang trabaho, aw padayon ang relaxation.
Ngita nalang og rason aron sa ilang labaw di makasab-an. Mao nay nakanindot kay ang selebrasyon sa Kalag-Kalag nasud sa ilang gitawag nga long weekend. Taas-taas sab nga kasaba niadtong wa pa ka-report sa trabaho nga wa magtarong og pananghid.
***
Apil ko sa naghinamhinam na nga mobiyahe pauli sa among baryo sa Punod, Pinamungajan nga makapanimulos sa mubo nga biyahe.
Kini human gipahibawo ni Gob. Gwen Garcia nga ipasemento ang nagusbat nga karsada nga nagdugtong sa lungsod sa San Fernando padung sa among lungsod. Pipila ka tuig na ang nakalabay kining karsadaha nga motadlas sa bukirang bahin sa lungsod sa San Fernando padung sa Pinamungajan maoy giagian sa among news team.
Among tuyo mao ang mga kaliwat sa 8th Division World Champion Manny Pacquiao.
Ang akong ig-agaw ang namatay na nga foreman nga si Lando Cabunilas nitug-an nga kon mag via Sangi, San Fernando mi, diretso na ang biyahe padung sa Anislag ug Guimbawian, Pinamungajan. Ang Barangay Guimbawian maoy among tuyo, ang dapit diin unang nagpuyo ang apohan ni Manny ug kaparentihan.
Gikan sa Guimbawian ang sunod nga baryo mao na ang sa akong inahan, ang Barangay Punod. Subra sa P40 milyones ang gigahin nga pundo alang ning maong proyekto. Kon mahuman, magkahulugan kini og sayon nga biyahe alang sa mga gustong magnegosyo ug maglulinghayaw.
Habig sa San Fernando kinsay wa makahibawo sa ka abunda sa mga hayop ug utanon nga iladlad sa tabo sa Sangi. Kon mobisita mo sa Carbon market naay daghan dinha nga manindahay og utanon ug lagutmon nga gikan sab sa bukid sa San Fernando. Naa sab sa Carbon ang gikan sa Guimbawian, Anislag ug Duangan.
Unya ang sikat nga mountain resort ug wave pool sa Barangay Lamac di man ni layo sa Guimbawian. Mas sayon na unya ang pagbiyahe gikan sa dakbayan. Ang naandan adto man agi sa Barangay Bunga pero moagi pa ka sa Barangay Don Andres Soriano, Toledo City.