TULO ka linog ang nitay-og sa Mindanao. Nakig-estorya ko ni Noel Punzalan, akong kauban sa Philippine News Agency, niadtong Biyernes sa dihang ang iyang nahimutangan gitay-og sa laing linog.
Kapin sa duha ka dosena ka kinabuhi ang nakalas sa linog sa Mindanao, gikan sa Barangay Malasila sa Makilala, Cotabato ngadto sa siyudad sa Davao. Daghan sa survivors nagkinahanglan sa atong pagtabang, gikan sa pagkaon ngadto sa nag-unang mga panginahanglan ug salapi.
Ang survivors sa linog sa Mindanao nag-antos usab sa kawad-on sa tubig. Mora silag mga konsumidor sa Metropolitan Cebu Water District nga di maka-supply og tubig bisag wa sa linog.
***
Ang death toll sa ikaduha ug labing kusog nga linog, ang 6.6-magnitude nga linog niadtong Oktubre 29, niabot na sa 14. Ang ubang mga taho nag-ingon nga 26 na ka mga kinabuhi ang nakalas sa linog sa Mindanao.
Mokabat sa 146,700 ka mga tawo sa 150 ka mga barangay sa Central Mindanao ug sa Danao ang apektado sa linog. Ang nakalisod niining linog kay di matag-an kon asa ug kanus-a motay-og.
Ang Philippine Institute of Volcanology and Seismology (Phivolcs) igo lang nga mosukod kon unsa ang gikusgon sa linog ug magpasidaan sa mga tawo nga mahimong apektado niini. Apan di sila makaingon nga panglayas mo kay linugon mo diha.
***
Ang bentaha sa taga Mindanao kay dunay tawo nga kon moingon nga pahunungon niya ang linog, mohunong sab ang linog. Mao kini si Pastor Apollo Quiboloy, ang pangulo sa Kingdom of Jesus Christ.
Matod ni Quiboloy, nagkape siya sa Samal sa dihang gitay-og sa magnitude 6.6 quake ang Davao. "Sabi ko, ‘Lindol, huminto ka. Huminto,” matod ni Quiboloy. Nihunong sab ang linog.
Mag-ampo na lang kita nga dunay Quiboloy sa Cebu nga makapahunong sa linog. Hain ang mas maayo nga mag-amping ta nga way linog.