SI BISE Presidente Leni Robredo nihulagway sa anti drug campaign ni Presidente Rodrigo Duterte nga pakyas kay nagbaha gihapon ang illegal drugs sa nasod. Bisan si Senador Panfilo Lacson nakaingon nga hayan dunay sayop sa kampanya busa, angay nga susihon sa administrasyon.
Di makabasol ang administrasyong Duterte sa mga pagsaway nga naani niini tungod kay sa iyang kampanya atol sa eleksyon, ang Presidente nisaad nga iyang sumpuon ang illegal drugs sa unang unom ka mga buwan sa iyang pangatungdanan. Iyang gisaad nga daghan ang mapatay sa iyang way puas nga kampanya.
Tuod man, natuman ang ikaduha kay liboan na ka drug personalities, apil na ang mga narco cop ug pulitiko, nangamatay taliwa sa iyang hugot nga kampanya.
Kon wa pa tingali mosaad si Duterte nga iyang sumpuon ang illegal drugs sud sa unom ka mga buwan ug mobanaw ang dugo, hayan di siya hukman og sakit. Mahimo ra unta siyang moladlad og mga programa, di manghulga ug manghambog.
Taliwa gud sa init nga kampanya batok sa illegal drugs, nagbaha gihapon ang drugas. Kinilo gud ang nasakmit sa kapulisan sa ilang mga anti drug campaign.
Apan tinuod bang pakyas ang administrasyong Duterte sa iyang anti drug campaign? Depende kon kinsa ang pangutan-on. Makita baya usab nga duna kiniy maayong impact. Sama sa pagtahan ug sayon na lang sa pagsubay sa mga drug personality sa pagsugod sa Oplan Tokhang. Wa pay administrasyon nga nakahimo niini.
Bisan ang pribadong mga organisasyon, lakip na ang Simbahan, aktibo nang nagtabang sa kagamhanan sa rehabilitasyon sa mga drug addict. Nakuhaan usab ang mga narco cop ug narco politicians sud sa kagamhanan.
Di madalag magic ang suliran sa illegal drugs. Dinhi nasayop si Duterte kay komplikado ang problema. Nalimot siya nga ang Davao tipik lang sa Pilipinas. Naunay na hinuon siya sa iyang hambog.