"BUHI pa intawon ko."
Mao kini ang tubag sa 83 anyos nga si John H. "Sonny" Osmeña, kanhi senador ug kanhi mayor sa Toledo City, kabahin sa tabitabi nga siya namatay na.
Nagpatawag siya og mga reporters niadtong Dominggo, Nobiyembre 3, sa usa ka restawran sa Cebu City aron pagmatuod nga siya buhi ug aron tubagon ang mga tabitabi nga siya nitaliwan na.
"Buhi pa tawn ko," matod niya apan aduna siyay stage 2 cancer.
Diha siya nahibaw nga gidungog siya nga patay na human mitawag ang iyang kanhi asawa sa iyang igsuong babaye niadtong Nobiyembre 1, kun tinuod ba nga nitaliwan na siya.
Gitubag kini sa iyang igsuon nga dili tinuod ang mga tabitabi, gani nagtupad sila ni Sonny niadtong higayona.
"We tracked it down and it comes down to somebody I know... I will not name the person who told this," sigon ni Osmeña.
Niingon ang nagpasiuna sa tabitabi ngadto kang Osmeña nga nakita daw kini niya sa balita.
"Go to your sources and inform them that I’m still alive," giingnan ni Osmeña ang gasulti niya.
Matod ni Osmeña, wa siya magtuo nga adunay politikanhong motibo ang tabitabi ug yano ra kini.
Dugang niya nga dili kini angay ikahibong nga mugawas ning maong tabitabi sanglit ang iyang mga kauban nga public officials nga kaedad ra niya
mitaliwan na.
"I have cancer. I was diagnosed with cancer last July," sigon ni Osmena.
Naa sa stage two ang iyang cancer. Nipaubos na siya og unom ka session sa chemotherapy.
Bisan pa man sa iyang kondisyon karon, dako gihapon ang pagsalig niya nga iyang malupig ang cancer.
"Apparently, it is a new drug because I didn’t lose my hair, I didn’t got thin and even gain more pounds, I sleep well... I am pretty sure that I will overcome this," matod ni Osmena.
Bisan pa man sa iyang cancer, padayon gihapon siya sa iyang mga naandan, mukaon gihapon siya sa iyang mga gusto ug mulambigit gihapon kini sa mga
butang nga mointeres niya.
Ang iyang kondisyon wala kini makapugong niya ug padayon gihapon kini sa pagserbisyo.
"In a private capacity yes, ang kanang pagserbisyo dako kaayo nang problema kay daghang issue," sigon ni Osmeña.
Gani aduna siyay plano nga housing project ngadto sa dakbayan sa Toledo ug naghimo sab siya og waste landfill.
"I am making a waste landfill, my own money, my own land, nothing from the government. When that is finished I will accept wastes from Cebu City, Mandaue, Naga, Minglanilla and Toledo," matod niya.
Himuon kini niyang personal nga negosyo.
Ipadayon sab ni Osmena ang pagkuha og daghang tubig aron makahatag og igong supply sa tubig ngadto sa mga lumulupyo sa dakbayan sa Toledo ug sa panahon nga magsobra kini mamahimo kini nilang ihalad ngadto sa syudad kung diin dako kaayo nga problema ang kuwang nga supply sa tubig.
Kining tanang proyekto usa inisyatibo sa probado nga kapasidad.
Iyang interes sa politika wala gihapon nihupay, ma-internasyonal man o diri sa nasud. Boring ang politiko sa Pilipinas, matod niya. "I'm bored. I'm bored with Philippine politics."