HUSTO nga pag-atiman sa lawas sama sa pagkaon og dasok sa sustansiya, dunganan sa ehersisyo ug sakto nga pahuway maoy mga sek reto ni Isabino “Tatay Bino” Abril nga miabot sa pangidaron nga 100 years old.
Gisaulog kagahapon, Nobiyembre 3, ang pagka-centenarian ni Tatay Bino nga taga-BF Homes, Barangay Basak, Lapu-Lapu City nga kanhi ‘kapitan del barrio’ sa Baybay, Leyte.
Samtang si Lapu-Lapu City Mayor Junard Chan personal nga mitunol sa pahalipay ngadto ni Tatay Bino og P100,000 nga birthday cash gift ug nagpa-party nga gitambungan sa mga sakop sa pamilya sa celebrant, paryente ug mga silingan.
Ang pahalipay kabahin sa Add Quality Life program sa Dakbayan sa Lapu-Lapu alang sa mga senior citizen.
Laing P100,000 ang madawat sa maong centenarian base sa Republic Act 10868 kun Centenarians Act of 2016, diin moabag ang City Social Welfare Development sa pag-proseso.
Si Tatay Bino nakabaton og walo ka anak ug wala na mahinumdom kon pila na ang iyang mga apo.
“Out of six centenarian nga akong gitambungan (sukad sa termino), karon pa ko kasuway og laki (niabot og 100 years old kay sagad mga babaye),” matod sa mayor sa dihang nahinabi sa Superbalita Cebu.
Ang unang gikataho nga sex maoy usa sa secret ni Tatay Bino bunga lang sa komedya sa usa sa iyang mga paryente atol sa pakigkukabildo sa mayor ug mi-jam ra sab ang birthday celebrant sa joke. (B)