DUHA ka supporters sa oposisyon sa siyudad sa Sugbo gihulga sa giingong tanod nga armado samtang paingon na unta mamilit sa ilang campaign materials sa Barangay Basak San Nicolas, siyudad sa Sugbo.

Nibunot og armas ug nisulod pa sa compound sa balay sa kandidato pasado ala una sa miaging hapon ug napa- blotter sa kapulisan pasado alas otso na sa gabii.

"The Manny Pacquiao Blog". Click here for stories and updates on the Filipino boxing champ.

Ang nisumbong sa kapulisan mao sila si Raul Recaredo “Deo” Del Rosario, 41, kandidato sa pagka konsehal ubos sa partidong Kugi Uswag Sugbo (Kusug) uban sa iyang duha ka mga supporter nga sila si Dave Santiago, 20, ug si John Cabillo, 18.

Sa pasiuna nga imbestigasyon ni SPO4 Alexander Quirante sa Mambaling police nagkanayon nga naglakaw sila si Santiago ug Cabillo, dala na ang ilang campaign material ug papilit nga gisulod sa balde.

Samtang naglakaw, ilang nalabyan ang duha ka mga lalake, usa kanila nailhan sa alyas nga “Ryan,” uban sa laing lalake nga nag-inom daplin sa dalan.

Niduol kini kanila ug gipangutana sila kon asa sila paingon.Gitubag kini sa mga biktima nga paingon sila mamilit og mga campaign material.

Apan ang suspek nga si Ryan nagkanayon nga “ayaw pagpapilit diri kay magmahay nya mo pagkahuman.”

Sa kahadlok nila ni Santiago ug Cabillo nibiya sila sa dapit.

Apan ilang namatikdan nga nisunod kanila ang mga suspek hinungdan nga nanagan ang mga biktima ug nipaingon sa balay ni Del rosario.

Sa dihang anaa na sila sa sulod, niabot pagkalit ang mga suspek nga sakay og motorsiklo, nibunot og armas si “Ryan.”

“Naglumba na lang og panagan ang duha, nangita og lugar nga ilang katagu-an. Wa magdugay misibat ang mga suspetsado,” matod ni SPO4 Quirante.Gidala pa paglakip sa mga suspek ang mga campaign material lakip na ang usa ka balde nga puno sa papilit.

Pag-uli ni Del Rosario nianang gabii, una pa sila nagpa blotter sa kapulisan.

Si Kapitan George Rama miingon nga wa siyay barangay tanod nga ginganlan og “Ryan”.Dugang pa niya nga wa niya tugoti ang iyang mga barangay tanod nga magdala og armas hinungdan nga iyang gipaubos og training sa “judo” matag Dominggo. (JFT)