NAGHILAK nga nagpatabang sa PNP Regional Anti Cyber-Crime Group 7 ang usa ka 22 anyos nga dalaga ug iyang inahan human nikatap ang iyang hubo nga video sa internet samtag nakig video call sa usa ka gituohang langyaw.
Si Susan (di niya tinuod nga ngalan), taga T. Padilla, Siyudad sa Sugbo, giubanan sa iyang inahan sa kapulisan aron ireklamo ang gihimo sa usa ka nagpailang Saleem Khan Afridi.
Iya kining nakaila pinaagi sa Facebook niadtong katapusang semana sa Septiyembre hangtod nga gihangyo siya nga mopakita sa iyang dughan pinaagi sa video call.
Ang lalake wa mopakita sa iyang nawong sa video call nila.
Iya kining gipakita lakip na ang pribadong bahin sa iyang lawas ug giingong gikuhaan pag hulagway.
Sa sunod nga mga adlaw, nag video call na usab sila, diin si Afridi nipakita ra sa iyang kinatawo ug nihangyo na usab nga maghubo ang dalaga bugti sa bayad.
Iya kining gihimo pinaagi sa pagpakita sa iyang tibuok lawas nga hubo ug gipaduwaan pa niini ang iyang kinatawo.
Nihangyo ang lalake nga maghilawas silang duha ug kon siya mobalibad, ipakatap niya ang hubo nga lawas.
Apan nianang pagka Huwebes sa buntag, Oktubre 26, gikan siya naligo, natingala na lang si Susan nga di na siya makaabli sa iyang Facebook page.
Dinhi na nagsugod nga adunay nag send og video sa iyang mga kabanay diin makita ang nawong sa dalaga nga gihulagway sa iyang inahan nga law-ay kaayo.
“Nahadlok na ko pag log in nako sa Facebook kay dili nako ka open man. Na-hack na ang akoang account. Mao na to nga naa nay nag send og video sa Messenger ni Mama,” matod ni Susan.
Wa masayod si Susan kon si Afridi naa ba sa Sugbo tungod kay gusto man makighilawas kaniya.
Si Andrea (di tinuod nga ngan), inahan, nagkanayon nga wa siya makasabot sa iyang gibati nga nakakita sa hubo nga video sa iyang anak.
Gusto siya nga maglagot o motiyabaw sa gihimo sa iyang anak nga unta nakagradwar man kinig kurso sa usa ka unibersidad sa siyudad sa Sugbo.
Matod niya nga wa sila magkuwang sa pahimangno sa iyang anak.
Di usab lisod ang ilang kahimtang tungod kay siya negusyante ug maayog trabaho ang iyang bana.