KAMPO ni kanhi Talisay City mayor ug karon konsehal Socrates Fernandez, ang nag-andam karon alang sa iduso nga motion for reconsideration (MR) ngadto sa Sandiganbayan.
Kini human nga nahukman nga guilty sa kasong obstruction of justice may labot sa pagkasikop sa iyang anak nga si Joavan Fernandez niadtong 2010.
Si Fernandez ang gituyo sa Superbalita Cebu sa iyang buhatan Lunes sa buntag, Nobiyembre 4, apan wala kini, dili usab kini motubag kon tawgan.
Si Talisay City Mayor Gerald Anthony Gullas, ang nitug-an nga nag-andam ang kampo ni Fernandez alang sa iduso nga MR. Gani sila, ilabi na nga kauban usab sila sa Alayon party, ang mopaluyo ug motabang kang Fernandez.
Matod ni Gullas, nga hangtod nga walay ipagawas nga desisyon ang Sandiganbayan sa iduso nga MR ni Fernandez, ilhon gihapon nga city councilor si Fernandez.
Usa na sa tabang sa kaubanan sa Alayon, alang sa konsehal, ang legal nga aspesto, matod ni Gullas.
Ang Sandiganbayan ang nipagawas og desisyon niadtong Oktubre 25, nga nakitaan nila nga sad-an si Fernandez ug silotan kini og perpetual disqualification sa paglingkod og katungdanan sa gobiyerno.
Ang anti-graft court nipagawas og desisyon, subay sa kaso nga obstruction of justice nga giduso sa Cebu Provincial Police Office niadtong 2010 ngadto sa Visayas Ombudsman.
Human nga Hunyo 4 sa susama nga tuig, giingong gikuha ni Fernandez ang usa ka pambabaye nga bag gikan sa sakyanan ni Joavan nga gikustodiya na sa kapulisan niadtong tungura.
Gawas sa perpetual disqualification sa paggunit og bisan unsa nga posisyon sa gobyerno, magbayad usab si Fernandez og P6,000 nga penalty.
“Ang amo lang gyud giingong ni mayor Soc nga whatever happens, kanunay man gyud mi motabang niya, especially sa proseso nga unsay atubangon niya,” matod ni Gullas. (FMD)