HUMAN sa nasinati nga laing pagtay-og niadtong Huwebes sa buntag, Oktubre 31, ning dakbayan sa Cagayan de Oro, nikatap dayon ang mga post sa social media kabahin sa tsunami advisory sa Davao Oriental nga niadto pang bulan sa Disyembre 2018 ang petsa sa balita ug kining giingong fault line sa Tagoloan, Misamis Oriental ug Cagayan de Oro.
Daghan ang mga nag-share niini sa walay pagbasa-basa sa unod sa maong balita nga nakamugna og mga kahadlok ug kabalaka sa kadaghanan.
Una na nga nagpahimangno ang City Disaster Risk Reduction Management Office (CDRRMO) dili magpadala o magpataranta ilabi na sa mga nagkatag diha sa social media nga mga pekeng balita sama sa tsunami alert ug uban pa.
Sunod-sunod ang nasinati nga pagtay-og sa dakbayan diin niadtong Huwebes, Oktubre 30, nasinatian na usab ang laing pagtay-og.
Dali nga nanggawas ang katawhan sa mga nagkadaiyang buhatan ug lakip na ang mga anaa sa mga mall.
Duha usab ka mga babaye ang gitabang ug gidala sa ambulansiya tungod na usab kay naglisod sa pagginhawa.
Sa pakighinabi sa usa sa mga trabahante, gibutyag niini nga sa pagkanaog nila gikan sa taas nga bahin sa ilang buhatan, nakasinati na sa paglisod sa pagginhawa ang maong mga empleyado sa Teleperformance.
"Teammates na sila. Pagnaog namo, naglisod na dayon na siya og ginhawa," pahayag sa usa sa mga trabahante.
Nasayran nga base sa Philippine Institute of Volcanology and Seismology (Phivolcs), mga alas 9:11 sa buntag sa Oktubre 31, nasinati ang magnitude 6.5 nga linog sa intensity 3 sa dakbayan sa Cagayan de Oro, samtang ang sentro sa linog namatikdan nga anaa sa 33 kilometers amihanang-sidlakan sa Tulunan, North Cotabato ug dunay gilawmon nga duha ka kilometros.
Dakong damyos usab ang gibilin sa maong linog sa dakbayan sa Davao lakip na sa Cotabato.
Sa pagsulat niini nga balita, wala pay gipagawas nga inisyal nga pahayag kalabot niini ang lokal nga kagamhanan sa siyudad ug mga hingtungdan nga ahensiya.