WALA pa mahuman ang kagubot kabahin sa board sa Metro Cebu Water District (MCWD). Apan makadasig ang balita nga magtinabangay ang Dakbayan sa LapuLapu ubos sa liderato ni Mayor Ahong Chan ug ang kasamtangan tagdumala sa tig-supply og tubig sa Sugbo.
Nabalita nga nagtigum na ang mga opisyal sa dakbayan ug sa water district kabahin sa unang water desalination plant nga tukuron sa isla.
Nagkanayon si Mayor Chan nga suportado niya ang mga plano sa MCWD nga girepresenta nilang OIC General Manager Jorge Gabriente.
Sa miaging Oktubre 22, 2019, nipirma si Mayor Chan ug kasabutan uban sa mga opisyal sa CitiCore Summa Water alang sa pagtukod og duha ka mga desalination plants nga tukoron diha sa syudad.
Mahuman na gani, gipaabot ang mga 20,000 cubic meters kada adlaw nga tubig. Inisyal pa lang kini.
MCWD
Gisayangan lang gyud ko sa dakong joint venture sa duha ka higanteng mga kompanya nga giandam unta ni kanhi MCWD chairman Joel Mari Yu.
Joint venture kini alang sa pagtukod og usa ka dakong desalination plant sa Mactan ug ang Mananga Dam.
Wa kini mahisguti atubangan sa publiko kay under negotiation pa man unta. Apan wala makauyon niining mga proyektoha ang bag-ong administrasyon. Mao nga giundang na lang nilang Yu ang negosasyon.
Pag-undang, gihimong rason nganong tang-tangon ang board kay wala kunoy giandam nga mga plano aron masulbad ang krisis sa tubig.
Ang akong nabalak-an karon kay kining stalemate sa liderato sa MCWD. Ubos sa balaod, di man pwede mo-take over ang LWUA. Wa man silay saktong basehanan aron moilis sa nahabiling board sa MCWD.
Sinulog
Nasulbad na kaha ang problema sa preparasyon sa Sinulog 2020 karong niluwat si Bise Mayor Mike Rama isip chairman sa Sinulog Foundation Inc.?
Atong nasabtan sa mga pamahayag ni Mayor Edgar Labella nga makig-coordinate siya kang SFI President Ricky Dakay aron mahimong hapsay ang relasyon tali sa Sinulog Board ug ang SFI.
Tingale, mas maayong tarungon sab ni Mayor Labella ang pagplantsa sa iyang relasyon tali ni Dakay nga gi-angin sa usa kaso batok sa kanhi mayor. Wa man gyuy labot sila si Dakay sa desisyon adto gud.
Mag-atang sab ko sa mahitabo inig hisgot na sa Konseho kabahin sa P30 milyones niini nga tabang alang sa Sinulog kay si Bise Mayor Rama baya ang presiding officer.
Sama sa nahitabo sa MCWD, naghimo lang gyud og problema ang mayor. (@anol_cebu sa Twitter)