ASIN tax? Napuno sa pagsaway ug bugal-bugal ang plano ni Health Sec. Francisco Duque III nga pabuhisan ang mga pagkaon nga parat kon daghan og asin sama sa potato chips o French fries tungod ug alang matud pa sa kaayohan sa atong panglawas.
Tungod kay ang buwad ug ginamos mga pagkaon man nga daghan og asin dunay dakong posibilidad kon madayon nga malakip sa mabuhisan. Dili lang kini pagkaon sa mga kabus apan apil na ang mga adunahan tungod kay lamian ug maoy naandan na sa katawhan.
Maayo ang katuyoan kay alang man sa kaayohan sa atong panglawas apan ang pamaagi dili makatarunganon. Ang gibuhat unta sa Department of Health (DOH) mao ang pagtudlo sa katawhan kon unsa ang pagkaon nga dili maayo sa atong panglawas imbis nga morekomendar ngadto sa kongreso nga buhisan ang parat nga mag pagkaon.
Naa bitaw sigarilyo nga gipatas-an na ang buhis apan daghan lang gihapon ang mosigarilyo bisan sa kamahal na sa presyo niini tungod kay ang tawo dili mapugngan sa iyang gusto nga kaonon o buhaton basta di lang ilegal. Wa na gyuy lain nga mahunahunaan ang atong mga opisyales sa DOH nga buhaton kay hasta ang mga pagkaon nga parat ila man gidaginot?
Samtang magpasalamat ta sa DOH kay nagtan-aw sila sa atong panglawas apan ang pagbuhis sa aning klase sa mga pagkaon di lang usa ka bangil sa mga nagnegosyo sa potato chips, buwad ug ginamos apan atong matawag nga paghatag pabor sa mga nagnegosyo og tam-is kay gibuhisan na man ang mga pagkaon ug ilimnon nga dunay asukar.
Mga halangdon nga opisyales sa DOH wa moy katungod nga mobabag kon unsay gusto nga lamyon sa usa ka tawo. Sa ako nga giingon sa unahan, ang angayan ninyo nga buhaton unta mao pag-edukar sa katawhan unsay maayo nga pagkaon ug dili maayo alang sa panglawas.
Kon tinud-on uroy sa mga kongresista nga walay konsensya nga mopasar og balaodnon nga buhisan na ang mga pagkaon nga parat, inyo ba nga gilantaw nga ang mga kunsomidor ra usab ang maglukdo sa buhis? Maputos na ta niini sa tanan klase sa buhis apan ang serbisyo sa gobiyerno alang sa katawhan way pulos.
Ang angayan nga buhisan mao ang asin aron mominos ang paggamit niini. Apan supak gihapon ko nga buhisan ang asin tungod kay alang kanako ang asin kinabuhi. Ngano? Tungod kay kon ang pagkaon kuwang sa asin way lami unya mora sad og wa tay kinabuhi. Gets ninyo? Unya og mahal na ang asin tungod sa buhis mosamot og kamahal ang presyo sa buwad ug ginamos nya luoy kadtong di mokaon og pamahaw nga walay pinirito nga buwad nga isda o nokus.
Ang maayo nga buhaton sa DOH gawas sa pag-edukar sa katawhan kon unsay maayo nga pagkaon sa atong panglawas mao ang pagpadayon sa pag-edukar sa mga magtiayon kabahin sa birth control aron di magkuwang ang atong pagkaon kay bilyun na ang atong papulasyon.