DAGHAN ang mga gumunhap ug mga tanghaga nga naglimen niining pag-demiter ni Bise Mayor Mike Rama isip chairman sa Sinulog Foundation Inc. (SFI). Unsa ba gyud ang mga nag-unang hinungdan? Gumikan ba kay giputlan ang iyang mga pako? Buot nakong ipasabot nga dili na siya makapabuot og maayo sa iyang gustong mahitabo kay naa naman ang Cebu City Sinulog Governing Board (CCSGB)?
Gumikan ba kay dili na daw siya papirmahon og mga tseke ug gidid-an na nga maka-solicit og mga sponsors? O nangluod lang gyud siya? Ang iyang rason nga gibatbat nganong ning resign siya gumikan kay wala kuno siya pahibaw-a sa tigum tali sa SFI ug sa CCSGB. Gi-blind kuno siya sa maong tigum kabahin sa preparasyon alang sa Sinulog 2020. Sus, pagkamabaw sa rason.
Ibutang nato nga wala siya pahibaw-a o nakatambong sa maong tigum. Apan didto nakatambong man si Eng. Ricky Dakay nga maoy presidente sa SFI. Wala maka-communicate si Eng. Dakay ngadto kaniya ug sa ubang mga sakop sa SFI? Ug nganong wala man usab siya makatambong. Mabaw ra man ning isyuha ba kon maoy basihanan ni Mike sa iyang pag-resigned. Hinoon, iya man nang katungod.
Ang tumong ug tinguha ni Mayor Edgardo Labella sa pagtukod sa governing board aron adunay mohan-ay og mga polisiya og direksiyon sa SFI. Aron motutok sa SFI labi pa sa mga pinansiyal nga aspeto kay dakong kuwarta ang gi-donar sa siyudad sa SFI alang sa matag tuig nga Sinulog activities. Mokabat sa P35 milyones ang donasyon sa city government ngadto sa SFI. Unya ang mga kita pa gikan sa mga sponsors?
Dakong pahat sa mga kita sa Sinulog ang wala matarong sa pag-account. Gikawatan pa sila diha sa ilang kaugalingon mga buhatan pipila ka tuig na ang nakalabay nga walay klaro o masuta kon gikawat ba gyud og kawatan o ba kaha nadispalko lang sa mga nagdumala diha. Wala ta mamasangil ha? Unya matod pa ni Mike nga bisan kon dili na siya ang chairman sa SFI ‘visible’ gihapon kuno siya. Buot ipasabot nga mosalida lang siya gihapon. Pagpuyo na Mike uy. (bobbygnalzaro@gmail.com)