ABOGADO ug ang iyang asawa, ingon man ang ilang katabang nga babaye, napalgang patay human maugdaw ang ilang balay atol sa sunog nga miigo sayo kagahapon sa kaadlawon sa Calderon compound, sityo Banawa, Barangay Guadalupe, siyudad sa Sugbo.

Amahan ug anak nga mga abogado ang nakalingkawas human makamata sa pagsige og singgit sa ilang mga silingan.

"The Manny Pacquiao Blog". Click here for stories and updates on the Filipino boxing champ.

Ang mga biktimang nangamatay wa na makagawas bisan sa ilang pagsuway paggawas sa ilang gipuy-an.

Ang nangamatay giilang mao sila si Manlalaban Manuel Pastrana, 79, ug iyang asawa nga si Norma, 74, ug ang ilang helper sulod sa usa pa lang ka buwan nga nailhan sa ngalan nga “Joy,” taga Negros Occidental.

Samtang ang nangaluwas mao sila si Justice Manuel Barios Sr., sa Court of Appeals ug ang iyang anak nga si Manlalaban Manuel Barios Jr.,

Sa pasiuna nga imbestigasyon nga gihimo ni SFO2 Anthony Gonzales sa Cebu City Fire Department, nakamata ang amahan ug anak nga Barios atol sa sunog tungod sa pagsinggit sa mga silingan og “tabang.. tabang”.

“Pagmata nila, nagdilaab na ang kayo sulod sa ilang kesame,” matod pa ni SFO2 Gonzales.

Dali silang mibangon ug nanggawas sa ilang lawak ug gitoktok ang lawak sa mga biktima nga anaa mag-ukopar sa pikas lawak.Apan wa na kini motingog ug makagawas sa lawak.

Tungod sa daling pagkaylap sa kayo, daling nanggawas ang amahan ug anak nga Barios nga way nabitbit nga butang.

Ang anak sa magtiayon nga si John Peter Pastrana nga anaa magpuyo kasikbit lang nila nga balay nakamata ug daling nipaingon sa balay sa iyang mga ginikanan.

Ilang gituyo sa pagguba ang kahoy nga bintana aron lang makasulod sa nagdilaab nga balay dungan sa pagsangpit sa iyang mga ginikanan, apan wa gyud kini makatubag.

Wa siya makalahos sa pagsulod sa balay kay misugat kanila sa pag-abli sa bintana ang nagdilaab nga kayo.

Dugang nasayran nga ang balay sa magtiayon nga natukod sa 1960s gikatakda na unta nga ipaguba karong buwana aron tukoran og bag-ong building.

Ang sunog naalarma ala una sa kaadlawon ug nakontrolar sulod sa 12 minutos. Gibana-bana kini nga nidanyos og P900,000.

Ang buwan sa Marso mao ang fire prevention month.

Giawhag sa Bureau of Fire Protection (BFP) ang publiko magmatngon sa sunog taliwa sa kainit sa panahon.