SAYANG. Kini maoy unang malitok sa atong pipila ka mga sports aficionados nga nakabasa sa bag-o lang kalampusan nga nakab-ot ni Wesley So, ang giilang Pinoy genius sa chess.
Sa niaging adlaw, si So, lumad nga taga Cavite, mipakaging sa world no. 1 nga si Magnus Carlsen aron langkaton ang kampiyonato sa World Fischer Random Chess Championship didto sa Henie Onstad Art Center sa Norway.
Daghang ang gianugonan kay Pinoy man gyud siya og dugo apan sa mga tournament nga iyang salmotan, nagrepresenta man siya sa US. Sukad pa kini niadtong 2014.
Duna usay uban nga wa mosimpatiya kaniya tungod lagi kay nganong dili man ang Pilipinas maoy iyang girepresentahan nga unta Pinoy man gyud ang iyang kagikan.
Duna say punto kining pangutanaha, pero kon nakasubay ka sa nasinati ni So, kinsay nasayod nga makabaton ka og kaluoy sa iyang sitwasyon ug mahapak ang imong pagbasol ngadto sa ato ra usab nga mga sports leaders.
Si So, kinsa maoy pambato sa National Chess Federation of the Philippines (NCFP), nakahukom nga mobalhin sa United States chess federation human kini naigo sa politika sa sports sa nasod.
Sa dihang naka-gold siya sa World Universiade Games wa siya hatagi sa gisaad nga P1 million incentives sa rason nga wala diay i-recognized ang maong kompetisyon sa gobiyerno. Pero ang lawom nga hinungdan tungod diay kay didto siya nahitapo sa laing grupo nga gikabangi sa Philippine Olympic Committee (POC).
Dako unta kini og ikatabang ni So, kinsa anaa na nagpuyo karon sa iyang adopted mother nga si Lotes Key sa US tungod kay, ang iyang mga ginikanan nagka-problema sab sa ilang relasyon atoa na kini sa Canada ug gibiyaan lang siya dinhi sa nasod nga nag-inusara.
Nakapanglantaw nga wala siyay ugma kon magpabilin siya sa grupo nga wa magtan-aw sa iyang kaaugma-on, nakahukom ang pinakabata nga nahimong Grand Master sa edad nga 14 anyos, nga hangupon ang tanyag sa US.
Daghang kilay nga miisa sa gihimo ni So, apan ang inilang chess master sa nasod nga si Eugene Torre hugot nga misuporta kaniya.
Sa interview, matod ni Torre, nga dili makab-ot ni So ang mga kalampusan kon nagpabilin pa siya dinhi sa nasod, nga para nako tinuod sab.
“So what if he’s representing the US federation?” matod ni Torre sa interview ni Dodo Catacutan sa Spin.ph.
“Sa akin, I look at it positively. Kung di nangyari ‘yan, baka di n’ya naabot ang naaabot n’ya ngayon. Nag-improve s’ya because he was exposed to the level of competition there.”
Salig si Torre ni So. Iyang gipasabot nga kon unsa kini ka maayo sa chess, maayo usab kini nga modala sa iyang kinabuhi. Pangandoy ni Torre ngadto ni So, nga sa endgame, magmalipayon ra gihapon si So uban sa iyang ikaduhang pamilya.
Gipadayag ni So nga bisan pa man sa iyang sitwasyon karon pabilin siyang usa ka Filipino.
“I am a true Filipino who cares about the future of Filipino children growing up in an endless cycle of corruption and zero opportunity,” ingon niya sa iyang email ngadto ni Catacutan.
“My heart aches for talented people there who because of poverty haven’t any hope for their futures.”
Sa pangutana kon andam ba siyang mo-represent og balik sa Pilipinas sa umaabot nga mga adlaw.
“What for? To endorse corruption? "dugang ni So.
Sakit man tuod alang sa mga hingtungdang sports leader sa nasod ang gipanulti ni So, apan mao kini ang kamatauran. Kamatuoran nga angay kapanaminan sa uban.
Ug kita sayod nga aduna pay daghang mga So sa atong mga atleta karon. Salamat Wesley So. Sa gihapon garbo ka sa nasod. (jun.migallen@gmail.com)