ALANG sa retired teacher nga si Herminia Posadas, di maundang ang pagkat-on.
Ang 64-anyos nga magtutudlo, karon farmer-entrepreneur, maikagong mihangop sa mga pagtulun-an pinaagi sa nagkadaiyang kasinatian sa iyang garden sa Barangay Angliongto.
Mapasigarbuhon siya nga ang iyang 50 square meters nga luna nagaprodyus og gulay alang sa pamilya.
Nakahimo sab siya sa pagpamaligya og seedlings ug uban pa, dason nga usa kini ka maayong negusyo.
"I want to learn more about how I can do this better," niya.
Ang interes niya sa pagpananum gipaambit sab niya sa uban.
Sa nanglabay'ng semana, puno ang iyang iskedyul sa pagkat-on og gardening pinaagi sa nagkadaiyang pagbansay, sama sa gihimo sa SM Foundation ug partners niini.
Si Posadas usa sa 136 ka partisipante sa Kabalikat sa Kabuhayan (KSK)-Rural and Urban Farmers Training Program.
Kini proyekto sa The SM Foundation Inc., Harbest Agribusiness Corporation ug Macondray Philippines, Department of Agriculture, Department of Social Welfare and Development, City Government of Davao, SM Supermalls, SM Markets ug BDO Foundation.
Ang Davao project gihimo sa Davao Food Terminal Complex sa Toril.
Tumong sa programa nga ma-empower ang mga magtutudlo, small scale farmers, DSWD 4Ps beneficiaries, ug senior citizens pinaagi sa pagmugna og kapasidad sa agro-eco system analyses, financial literacy, ug sustainability.
Sa kasamtangan, may 19,722 ka graduates na sa 2,761 ka barangay sa 708 ka munisipalidad lukop nasud.
Sa nakalabay nga Oktubre 10, ang Davao participants sa KSK ang nagmaya human matapos ang ilang pagbansay.
Ang "Harvest Festival In The City" mitapos na sa ilang uwahing sesyon.
"The best part about the harvest are the lessons we learned and the relationships we grew," ni Posadas. (Uban ang PR)