Roldan: Kalamidad o silot?

HUMANA ang kalag-kalag. Apan hangtod karon daghan sa atong mga kaigsuonan sa Mindanao nga nagbangutan tungod sa trahedya sa kusog nga linog nga nitay-og niadtong Oktubre 16.

Gisundan kini og duha pa ka dagkong linog sa Oktubre 29 ug 31 diin gatusan ka mga "aftershock" nga nakapatay og pipila ug nakaguba og libuan ka mga gambalay dinhi sa Davao, Digos, Magsaysay, Tulunan, Makilala, M'lang, Kidapawan ug uban pa.

Hasta ang kampanaryo sa simbahan ni San Miguel sa Padada nga gitukod niadtong 1950's natipak usab sa kakusog sa pagtay-og.

Anaa say gibalita nga dagkong "landslide" sa tiilan sa Mt. Apo sa munisipyo sa Makilala busa namakwit ang daghang biktima ngadto sa sentrong bahin sa Barangay Malasila, Makilala, Cotabato Province.

Niadtong Dominggo sa buntag niadto ang akong pamilya ngadto sa Malasila aron magdala og "relief goods" sa akong mga paryente nga sila si Tiyo Ireneo ug Tiya Marcela Campasas Mendoza ug ilang mga pamilya.

Nagpuyo sila sa ibabaw sa bungtod haduol sa kampo sa sundalo sa likuon nga pasubida padulong sa sentro sa Makilala. Gibalitang nagun-ob ang ilang balay nga gama sa semento og didto na sa tolda sa hawanang bahin atubangan sa ilang balay ilawom sa mga kahoy nga goma.

Sa pagpadulong namo didto, among nakauban ang hataas nga convoy sa sakyanan, truck, panel, ambulansiya, tanke sa tubig, kapulisan ug kasundalohan nga may dalang "relief goods" para sa mga bakwit nga gikan dinhi sa Davao.

Human sa hapit duha ka oras nga biyahe among nakita ang daghang tawo daplin sa dalan nga may bitbit nga karton ug karatula nga nangayo og tabang. Naay puy nagtolda daplin sa ilang balay nga natumba samtang nagpunsisok ang tawo sa gym sa eskwelahan gikan sa Bansalan hangtod na sa Kidapawan.

Mas daghan ang tawo nga namakwit sa Malasila Elementary School ug Malasila National High School sa daplin sa highway nga gikan sa mga sudlunong barangay tungod sa landslide. Ubay-ubay sab nga mga pribadong responders ug mga ahensiya sa gobyerno nga nagtabang.

Nakita ko ang mga tanker sa tubig sa Philippine Red Cross ug pribadong tigbaligya'g tubig. Nagkulang gihapon ang tolda, habol, tambal, "hygiene kit" ilabi na sa mga bata ug babaye, tubig ug sudlanan sa tubig nga mainom, ug uban pa.

Matud pa sa akong uyoan nga nibalik na'g agas ang ilang tubig sa buntag sa Sabado. Sa among pag-abot sa ilang pinuy-anan, niabot usab ang usa ka pick-up gikan sa Tacurong nga nanghatag og tubig ug bugas.

Tuyo ko usab sa pag-adto didto nga mahibal-an ang kahimtang sa mga kabataan kay plano sa among grupo sa Mindanao Action Group for Children's Rights and Protection nga magtukod og mga Child Friendly Spaces sama sa gihimo namo sa Compostela Valley pagkahuman sa Bagyong Pablo.

Kalamidad ba kini o silot sa kahitas-an? Matud pa ni Leah Navarro, kanhi sikat nga mag-aawit ug iladong kritiko ni PRody nga silot na kini sa kahitas-an sa daghang sala sa presidente ug mga DDS (Diehard Duterte Supporters). Para nako yabag ang iyang tunada. Mouyon mo ani?