KIDAPAWAN CITY -- Bungkagon gamit ang kanyon sa militar ang dakong linaw sa tiilan sa Mount Apo nga namugna human sa nahitabong pagdahili sa yuta.
Sa aerial survey sa Tactical Operation Group (TOG) sa Philippine Air Force, uban si North Cotabato Vice Governor Shirlyn Macasarte Villanueva, nakita ang dakong landslide sa tiilan sa Mount Apo nga posibleng hinungdan sa trahedya kung mapuno kini sa tubig ug modahili paubos ug ig-on ang komunidad sa Makilala.
Usa sa mga nakita nga solusyon mao ang pagpabuto niini sa militar gamit ang 105 mm Howitzers Cannon.
Hinuon, giklaro nga di pa kini mao ang pinal nga hukom ug kinahanglan pa nga tun-an pa og maayo aron di mabutang sa alanganin ang kahimtang sa mga molupyo sa ubos nga bahin ug mga kasikbit nga dapit.
Sa dihang nitay-og ang magnitude 6.5 nga linog niadtong Huwebes, Oktubre 31, nidahili ang dakong bahin sa may tiilan sa Mount Apo ug dunay napundo nga tubig.
Apan gitataw ni acting Governor Emmylou Mendoza nga delikado ang planong pagpabuto sa linaw, busa kinahanglan nga susihon kini pag-ayo aron dili sila mabasol sa mamahimong epekto niini ngadto sa katawhan.