BASI sa ulahing report, moabot ngadto sa 23 ka mga tawo ang nangamatay pagtay-og sa yuta didto sa Cotabato ug kasikbit nga mga dapit.
Ang una ug ika duhang linog nahitabo niadtong Oktobre 16 nga mirehistro 6.3 ug 6.6 magnitude sa Tulunan Cotabato. Unya nitay-og na usab ang linog niadtong Octobre 29 ug 31.
Sa kinatibuk-an moabot ngadto sa 403 ka mga tawo ang nasamaran. Dunay duha nga missing ug gituohan natabonan atol sa langslide.
Kapin sa 3,220 ka mga gambalay ang nangadaot atol sa linog.
Unsa may dakong mensahi aning panghitabo karon sa atong palibot? Angay ba kita mabalaka ug maguol o mahadlok?
Alang sa tinuod nga Kristohanon, gipaabot na nila kining panghitabo karon ug wala sila malisang. Nasayod sila nga kabahin kini sa kalisdanan sa ulahing mga adlaw.
Ang Mateo 24:7 nag-ingon: “Makiggira ang nasod batok sa laing nasod ug ang gingharian batok sa laing gingharian. Moabot ang mga linog ug kagutom sa nagkalainlaing mga dapit. Kining tanan sinugdanan pa lang sa mga kalisod nga moabot.
Mao ni ang tubag ni Hesu-Kristo sa pangutana kon unsa ang timailhan sa ika-duhang pagbalik sa kalibutan.
Sinugdanan lamang kining tanan ug duna pay mas grabe unya nga panghitabo nga ikatingala sa kadaghanan.
Pagkakaron, angay buhaton sa gobiyerno ang pagpangandam kanunay aron mapahiluna gilayon ang mga tawo nga maapektohan sa kalamidad.
Kay mosugot ta og dili, anaa kanunay kining katalagman mahitabo sa atong palibot. Busa, mas bentahan nga dunay igong pagpangandam ang gobiyerno nga maayodahan gilayon ang mga bitkima.
Ang importanti sa tanan mao kining pagpangandam sa atong kaluwasan. Dili ta mahibaw sa atong dangatan ug walay nasayod sa atong kaugmaon.
Moabot man ang katalagman ug nagpadayon ta sa pag-alagad sa Ginoo, dili ta mabalaka sa atong dangatan kay anaa nato ang kasegurohan ug kaluwasan.
Apan, kon wala ta mangandam sa atong espirituhanon nga pagkinabuhi ug wala sab mangandam atong gobiyerno, nan, makaluluoy kaayo atong kahimtang.
Isipon nato nga dakong mensahi kini sa Ginoo ang ulahing linog nga nahitabo sa Cotabato. Mensahi alang sa pagpangandam ug pagpalig-on sa atong pag-alagad ngadto kaniya.