TUNGOD sa padayon nga pagkatap sa African Swine Fever (ASF) sa Luzon, gilugwayan na kutob Hunyo 30, 2020 ang pag ban sa mga produktong baboy gikan sa Luzon aron malikayan ang pagsulod sa maong sakit nga makapatay sa mga baboy.
Kini maoy gipahibaw ni Gobernador Gwendolyn Garcia atol sa interbyu sa mga tigbalita sa Lunes, Nobiyembre 4, 2019.
Ubos sa kasamtangang executive order nga nagpalibot sa Sugbo, moabot lang sa 100 ka adlaw unta nga ban ang ipatuman nga epektibong mapupos karong Disyembre 26, 2019.
Apan tungod kay way nakitang improvement ang gobernador sa pagsumpo o pagpahunong sa ASF virus nga mikatap sa Luzon ingon man ang sunod-sunod nga pagpositibo sa mga iladong produkto sa baboy sa laboratory tests, mas desido siya sa desisyon nga lugwayan pa ang order og 238 ka adlaw.
Mikonsulta usab siya sa provincial veterinarian sa gihimong mando.
“It does not elate me to state that because of all that we are now seeing in Luzon where the ASF virus is not contained and in fact is spreading in alarming proportions... I have decided to extend the total ban, from all pork and pork related products coming not only from the ASF infected countries, but coming also from Luzon,” matod ni Garcia.
Ang Sugbo ginganlan isip ika upat sa labing dako nga pork producer sa tibuok nasud nga moabot og P11 bilyones nga kita sa matag 53, 890 ka toneladang annual production.
Matod ni Garcia nga di matuis ang iyang desisyon ilabi na sa kadaghan nga hog raisers nga maapektohan kon makasulod ang ASF sa Sugbo.
Mipasalig si Garcia nga dali niyang libkason ang ban kon iyang makita nga ma-contain na ang ASF virus sa Luzon.
Epekto
Kadaghanan sa mga fast food chains sa Sugbo wa na namaligya og mga pagkaon nga gikan sa karneng baboy aron paglikay sa ASF.
Nagsugod ang wa na pagbaligya sa dihang gi-ban na ang karneng baboy sa Sugbo niadtong Septiyembre 2019.
Ang pork ban gimando ni Garcia pinaagi sa iyang Executive Order (EO) 16 nga wa lang mag-ban sa imported nga karneng baboy gikan sa mga nasod na apektado sa ASF, apil na usab ang gikan sa Luzon.
Adunay mga fast food sa Siyudad sa Sugbo nga nagbutang og pahibalw nga ang mga pagkaon nga gikan sa karneng baboy wala na nila gipamaligya.
Anaa say uban niini nga nagpahibalo nga ang mga spaghetti ug hotdog dili hinimo sa karneng baboy aron paghatag og pagsalig sa mga kustomer.
Matod sa mga outlet nga way halin ang maong mga pagkaon nga giklan sa karneng baboy tungod sa ASF.
Positibo
Samtang ang Pampanga-based Mekeni Food Corporation sa Lunes, Nobiyembre 4, nikompirmar nga duha sa iyang mga produkto dunay kagaw sa ASF.
Sa iyang pamahayag, ang Mekeni nitumbok sa batches sa Mekeni Picnic Hotdog Regular (500 grams) ug Mekeni Skinless Longaniza (uncooked, 200 grams) napalgang dunay DNA traces sa ASF bisan sa ilang pagtuman sa tanang regulatory requirements.
Tanang Mekeni pork-based products gibawi ug gikuha gikan supermarket ug ubang sales outlets sa Oktubre 26, 2019.
“These products are currently quarantined and a batch sampling has been submitted to an independent laboratory for ASF testing. We are still waiting for the results of these tests,” matod sa kompaniya.
Ang ilang pasilidad gilimpyuhan ug gi-disinfect. Usa ka third-party company ang ilang gipahimo sa swabbing ug testing sa pasilidad.
“These measures are part of our commitment to support the government in its campaign to control the further spread of the ASF that is threatening the hog industry,” matod sa kompaniya. (ANV, JMT, MVI sa SunStar Philippines)