GISIKOP sa kapulisan ang 37 anyos nga asawa ug ang giingong 31 anyos nga kabit human sila maabti sulod sa lawak sa usa ka lodging house sa Barangay Calajoan, lungsod sa Minglanilla, ala 1 sa hapon sa Lunes, Nobiyembre 4.
Nagduda na siya kay ang iyang asawa nagpahumot og maayo sa wa pa molakaw.
Ang bana nga naniid na kanunay sa iyang asawa nakakita nga nanulod ang iyang asawa ug ang lalake pasado alas 12 sa udto hinungdan nga dali siyang nagpatabang sa Minglanilla Police Station.
Niresponde ang mga pulis uban sa bana, ilang gipuntirya ang lodging house.
Sa dihang gituktok na sa mga pulis ang pultahan nga maoy gitudlo sa room boy, nataodtaoran pa una nakaabli ang duha sa pultahan kay nag-ilis pa.
Nagduda ang bana nga nahuman na ang pagtagay sa lawasnong kalipay tali sa iyang asawa ug sa lalake.
Matod ni Police Master Sergeant Jonel Ater, desk officer sa Minglanilla police station, nga sigun sa pamahayag sa asawa, dugay na sila nga way maayong relasyon tali sa iyang bana.
Ang lalake taga Barangay Cogon, Siyudad sa Naga samtang ang magtiayon taga Barangay Candulawan, Minglanilla.
“Nasundan daw ni niya pero daan na ni siyang nagduda nga naay laing lalake ang iyang asawa kay murag wala na man ni silay maayong relasyon isip banag asawa,” matod ni Ater.
Nagduda ang bana nga dunay ikakita ang iyang asawa kay nagpahumot og maayo.
Matod niya nga kon sila ang maghilawas, manimaho ra ang iyang asawa. Giangkon niyang taudtaud na silang way maayong relasyon.
Kasong adultery ipasaka karong adlawa sa kapulisan batok sa duha nga nabalhog na sa Minglanilla police station. (AYB)