ANG kapulisan sa Talisay magpatrolya bisan sa mga sudlunon nga dapit sa dakbayan matag gabii aron wala nay mabiktima pa sa mga tulis, hold-up ug uban pang klase sa kremin.
Gawas sa gihimo na nga mga pag-roving sa mga sakyanan sa mga pulis atol sa kagabhion, matud ni Police Major Gerard Ace Pelare, ang hepe sa Talisay City Police Station, nga mismo sila mga pulis ang maglakaw ug moduol sa mga tawo.
Usa kini ka paagi pagpakita sa presensya sa pulis aron mas dali alang sa mga tawo ang pagpaduol sa kapulisan, dugang ni Pelare.
Kalit-kalit ang himuon nga pagsuroy sa mga pulis diha sa mga lugar nga dagsaan sa mga tawo, mingaw ug kadtong kanunay na nga adunay mabiktima sa bisan unsa nga kremin, atol sa kagabhion.
Kagabii, Oktubre 4, gihimo ang pagpatrolya diha sa Mananga bridge ug sa ilawom niini.
“Increased and strategic presence of police officers saturates critical areas in Talisay City at night. Police formations are not done in the police station but in areas of convergence where criminals usually dwell,” pagpasabot ni Pelare.
Kahinumduman nga sa pipila ka mga semana, subli na usab nakadawat ang social media page ni Talisay City Mayor Gerald Anthony Gullas sa mga chat sa Talisaynon nga nireklamo nga nabiktima sa tulis.
Hangyo lang usab ni Pelare sa mga nabiktima nga moduol sa pinakaduol nga police precinct sa syudad, diha sa Lawaan 1, Bulacao, sa Tangke ug sa main police station sa barangay Poblacion.
“Making sure that dark alleys are patrolled and suspicious persons are kept in check to deny opportunity to perpetuate crimes. The City of Talisay PNP will keep our guards high day and night to preserve the peace and ensure security for the peace-loving citizens of the City,” dugang ni Pelare. (FMD)