SULOD ning buwana, butangan na og rumble strips ang lugar diin permi madisgrasya ang mga sakyanan sa Cebu South Coastal Road (CSCR) ilabina sa atubangan sa Talisay Fish Port, isip dinaliang solusyon.
Ang Department of Public Works and Highways (DPWH) 7 pinaagi ni 2nd District Engineer Lesley Molina nisaad ngadto ni Talisay City Mayor Gerald Anthony Gullas, Jr. atol sa ilang tigum, Martes sa buntag, Nobiyembre 5.
Nitambong usab sa panagtagbo sila si Konsehal Ferdie Rabaya, chairman sa committee on traffic, ug Joy Tumulak, pangu sa City of Talisay-Traffic Operations and Development Authority (CT-TODA).
Kini human sa sunodsunod nga disgrasya sa lugar, diin ang sakyanan nga gikan sa dakbayan sa Sugbo padulong sa habagatang bahin moambak ngadto sa center island ug moabot sa pikas nga lane nga makaigo sa laing sakyanan.
Niadtong Oktubre 14, usa ka sakyanan ang kalit nga mitipas sa pikas lane hinungdan nga nakadasmag og laing sakyanan. Ang aksidente nikalas og usa ka kinabuhi sa usa ka motorista.
Matod sa mayor nga ang rumble strips usa lang ka short term solution.
“Rumble strips are road safety features that could help alert inattentive drivers of potential danger by causing vibration and rumbling from the wheels into the car. Kung pa south ka, just before the right turn after the bridge, we will put strips na magkurog kurog imong awto para dili katulog mga tawo. Kay usually people tend to doze off that’s why accidents happen,” pasabot sa mayor.
Matod ni Gullas nga nipasalig ang DPWH nga mabutang kini sa di pa ang Nobiyembre 20.
Laing gipasalig sa DPWH ngadto sa kagamhanan sa Talisay City, nga mapabutangan og railings ang center island diha sa CSCR.
“Hopefully, mabutang sa 2020 budget and ma-implement nila next year. But also, we urged motorists to practice caution when driving their vehicles along that part of the road to avoid accidents,” pasidaan ni Gullas. (FMD)