CALL center agent si Rowena. Alas tres sa hapon hangtod alas onse sa gabii ang iyang dyuti. Gikan sa ilang opisina sa IT Park nga nahimutang sa Lahug, Cebu City, nag-atang siyag dyip padulong sa Colon, diin mosakay na sab siyag laing dyip paingon sa Inayawan diin siya magpuyo uban sa iyang mama Juliana nga bag-o lang nabiyuda. Sa miaging tuig namatay si Daddy Randy niya dihang ang habalhabal nga gisakyan nabanggaan sa awto kansang drayber nakainom nga nagmaneho. Samtang nagpaabot og dyip nga rota 04C (Lahug-Carbon-vice versa) kalit nga dihay awto nga mihunong sa iyang tungod. Mikawas ang usa ka lalaki gikan sa ‘backseat’ sa sakyanan ug gitionan siyag rebolber.
“Hala, Gwaps, sakay!” mando sa lalaki nga migunit sa bukton ni Rowena ug mitulod niya sa sulod. Wala siya makatingog sa kahikurat. Milingkod siya sa ‘backseat’. Mitupad kaniya ang lalaki nga nagbitbit sa armas.
“Good evening, Wenna!” timbaya sa drayber nga diha sa ‘frontseat.’ Milingi kini kang Rowena.
“Freddie?” ni Rowena nga nahibulong. Si Freddie usa sa duha ka lalaki nga nanguyab kaniya. Gi-basted niya kini bag-o lang kay si Ferdinand ang iyang gisugot nga usa ka maestro. Si Freddie anak og negusyante. “Freddie, unsay buot ipasabot niini?”
“Simpol da ang tubag,” ni Freddie. “Dad-on ka namo sa paraiso, diin tua ang himayang dayon! Di ba Charlie?”
“Mao gyud!” ni Charlie nga misimhot sa buhok ni Rowena.
“Isumbong ta mo sa polis ning inyong gihimo nako!” ni Rowena nga mihilak.
“Don’t cry for me, Argentina,” kantalita ni Freddie. “Nagtuo ka nga inigkahuman namog kutlo sa imong bulak, binlan ka namog gininhawa? No. No. No. Wa ka kahibawo sa kasakit nga akong gibati dihang wa mo dawata ang akong gugma! Mao nga manimawos ko. Di ba, Charlie?”
“Mao gyud!” ni Charlie nunot ang pagkagiki. “Hehehe! Makaapil pa ko!”
Gipahunong ni Freddie ang awto sa usa ka awaaw nga dapit sa lungsod sa Consolacion. Mikisikisi si Rowena dihang gipakawas na siya ni Charlie sa sakyanan.
“Adto ta siya dad-a sud sa menteryo kay way maka-disturbo nato didto,” matod ni Freddie. Gihulbot niya ang usa ka panyo gikan sa iyang bulsa ug gibaatan niini ang baba ni Rowena aron ang dalaga dili makasinggit aron mangayog pakitabang.
Sulod sa usa ka bukas nga mausoleyo gigakos ni Freddie si Rowena samtang nagtan-aw lang si Charlie. Misukol si Rowena. Buot niyang paakon ang dunggan ni Freddie, apan may baat ang iyang baba. Mao nga dihang nakahigayon siya, iyang gisagpa ang nawong ni Freddie nga gigamhan sa kasuko. Gisuntok niya ang tiyan ni Rowena nga miagungoy sa kasakit ug nalup-og kini sa sementadong salog. Wa na siya makapugong kang Freddie nga misugod paghushos sa iyang ‘skinny jeans.’
Unya kalit may miamag nga puting anino sulod sa mausoleyo. Nahunong si Freddie sa iyang gibuhat. Nahingangha siya sa pagkakita niya sa puting anino nga nahulma og usa ka tawo nga nagsul-ob og barong. Miduol kini kang Freddie nga nahasiga ang mga mata sa kahadlok. Kalit nga mitindog si Freddie.
“Multo, Charlie! May multo dinhi!” singgit ni Freddie nga misutoy pagdagan paingon sa gawas sa sementeryo. Dali pod nga nakasunod pagdagan si Charlie.
Nakita ni Rowena kadtong tanan. Gibati sab siyag kahadlok sa aninong puti. Iyang gitangtang ang panyo nga gibaat sa iyang baba. Dihang miatubang ang aninong puti kaniya, nakita niya nga nagpahiyom kini kaniya. Ug nahanaw ang iyang kahadlok dihang naklaro niya ang panagway sa aninong puti. Usa na ka tuig nga kini mibiya kanila ni mama niya.
“Daddy, thank you for saving me! I love you, Daddy!” ni Rowena nga midanguyngoy.
Mikaway sa iyang kamot ang aninong puti, dayong kahanaw. (KATAPUSAN)