DILI matukib ang kalipay nga gibati sa mga Sugbuanon karon, labi na gyod ang pamilya nga Garcia.
Tiaw bay ang usa sa atong labing kusgan nga babaye nga opisyal sa Department of Foreign Affairs (DFA) nga si Honorary Consul Armi Lopez Garcia gipasidunggan isip recipient sa Order of Friendship sa Russian Federation.
Ug ang nakanindot pa gyod kay siya pa ang una nga babaye nga consul nga gipasidunggan sa maong pasidungog.
Ug ang labing nindot pa kay mismo si Russian President Vladimir Putin ang mihatag sa maong pasidungog kang Consul Armi Lopez Garcia.
•••
Sa wala pa molarga si Consul Garcia padulong sa Moscow aron dawaton ang maong pasidungog, mihapit pa siya sa Paris, France alang sa gihimo nga Salon du Chocolat ug nahinabi nako siya mahitungod sa maong kalihokan.
Apil ang pamilya ni Consul Garcia sa Salon du Chocolat ubos sa pangalan nga Armson Food Corporation.
•••
Dili yano-yano o ordinaryo ang Salon du Chocolat.
Tiaw bay ang tanang mga mag-uuma sa cacao sa tibuok kalibotan misalmot sa maong kalihokan ug nagtigi sa labing lami nga tsokolate sa tibuok kalibotan.
Atol sa maong kalihokan sa Salon du Chocolat ang laing importanteng kalihokan sa pamilya ni Consul Armi Garcia.
Unsa man?
Nagkatapok sab ang tanang sakop sa pamilya ni Consul Armi ug kanhi Kalihim sa DOTC nga si Jesus Garcia Jr. didto sa Paris, France.
•••
Laing makalipay nga hitabo sa Salon du Chocolat 2019 mao ang pagkapili sa usa ka mag-uuma nga Pinoy isip usa sa kinamaayohan nga cacao beans sa tibuok kalibotan.
Ang maong pasidungog gihatag ngadto ni Mang Jose Saguban nga taga Davao City.
Si Jose Saguban napili nga top-5 sa Asia-Pacific Region. Gibahin man sa upat ka rehiyon ang maong panagtigi sa labing maayo nga cacao sa tibuok kalibotan.
Dili matukib ang gibati ni Mang Jose.
Tiaw bay una pa siya nakasakay og awroplano unya deretso pa gyod og lupad padung sa Paris, France.
Sa dihang ako siyang gipangutana kon unsay iyang gibati sa maong pasidungog, kalma lang kaayo misulti si Mang Jose: “Tugnaw man diay kaayo dinhi. Maglisod pa gyod ta og sulti. Lahi pod ilang pagkaon dinhi. Pero nalipay kaayo ko nga naapil ang Pilipinas sa gihatagan og pasidungog. Tiaw bay tigi man kini sa tanang mga mag-uuma og cacao sa tibuok kalibotan.”
Nakadayeg ako ni Mang Jose kay ang pasidungog nga iyang naangkon wala niya angkona nga iyaha ra kondili pasidungog alang sa nasod nga Pilipinhon.
•••
Kining maong lindog usa pasidungog alang kang Consul Armi Lopez Garcia ug ni Mang Jose Saguban.
Ang ilang gihimo, labi na gyod ang gihimo ni Mang Jose, nakahatag og dakong pasidungog sa tibuok nasod ug naapil na ang Pilipinas sa mapa sa kalibotan nga nag-uma og cacao.