Editoryal: Cyber libel: tsismis pa

Editorial Cartoon by John Gilbert Manantan
Editorial Cartoon by John Gilbert Manantan

PAGKALUOY sa duha ka inahan nga dakpunon tungod sa kasong cyber libel tungod sa giingong pagpasapasa og libak batok sa laing inahan pinaagi sa group chat sa mga ginikanan sa usa ka tunghaan sa dakbayan sa Bogo.

Ang warrant of arrest giluwatan ni Judge Ramon Daomilas, Jr. sa RTC 7 Branch 11 sa siyudad sa Sugbo sa kalapasan sa Section 4 (c) (4) sa Republic Act 10175 kun Cybercrime Prevention Act of 2012 o cyber libel.

Nabulilyaso human usa mga miyembro sa maong group chat nikuha og screen shot sa messages sa linibakay ug gipabasa kini sa hingtungdang inahan, kinsa niulbo ang kaspa sa kasuko ug nipasaka og kasong cyber libel tungod sa pagkadaut sa iyang dungog.

Sagad sa mga inahan nga maghuwat sa ilang mga anak sa gawas sa tunghaan, magtapuktapok ug lingaw nga sultihanay. Apan dunay higayon nga magpalabi ang tabitabi batok sa laing grupo o inahan sama sa kaso sa Bogo.

Dili sama niadto nga maghingut-anay ang mga libakera apan karon tungod sa pag-uso sa mobile phones, ang pagtabitabi mura’g wala lang human ipaagi kini nila sa group chat. Matingala lang ka nga mokalit og bahakhak ang imong tupag nga nakatutok sa cellphone.

Medyo bag-o ang kaso sa cyber libel sa Bogo. Kasagaran mao ang cyber crime sama sa pag-upload sa sex videos o scandals ug pag-post sa hubo nga hulagway sa internet. Ning ulahi sad, usa ka 22-anyos nga taga T. Padilla, siyudad sa Sugbo nga nagpatabang sa PNP Regional Anti Cyber-Crime Group 7 human nikatap ang iyang hubo nga video sa internet samtang nakig-video call sa usa ka gituohang langyaw nga nagpailang Saleem Khan Afridi.

Cyber libel o crime, mga bag-ong matang sa kaso mugna sa modernong panahon, pulos nagdala og dakong multa ug bug-at nga silot batok sa mahukmang sad-an. Pasidaan ug leksyon sa yanong molupyo, tsismis pa more.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph