MGA duwa karon
4:30 pm-San Miguel batok Blackwater
7:00 pm-Magnolia batok Phoenix
Mobangon og suway gikan sa duha ka sunodsunod nga kapildihan ang San Miguel Beermen sa ilang pagpakigbatok sa Blackwater Elite sa premirong duwa karong hapon sa Philippine Basketball Association (PBA) Governor’s Cup sa Cuneta Astrdome.
Ang Beermen, nga nagtinguhang makasakmit sa ikaduha nilang Grandslam title ning maong komperensiya, gikan sa dagkong kapildihan batok sa Meralco Bolts, 125-99, ug NorthPort Batang Pier, 127-119.
Ang maong mga kapildihan mao ang nagduot sa Beermen sa ikalimang dapit bitbit ang 5-3 nga rekord hinungdan nga gituohang mamungot kini batok sa nagkagidlay nga Elite.
Hinuon dakodako pa gihapon ang poruhan sa Beermen nga makaabante sa sunod round hilabi na nga nagsikit ra ang rekord sa teams nga naa sa tungang bahin sa standing.
Nagpasabot kini nga ang usa ka daog o pilde dako kaayo’g epekto sa kampanya sa team.
Sa ilang bahin, ang Elite wala nay poruhan nga makaabante sa sunod round dala ang 2-7 nga rekord.
Apan bisan pa niini, gilaumang mokombati gihapon og insakto ang Elite aron mahashasan ang ilang abilidad alang sa ugma damlag.
Sa main game, magsangka ang Magnolia Ang Pambansang Manok Hotshots ug Phoenix Pulse Fuel Masters.
Ang Hotshots adunay 4-4 nga rekord samtang ang Fuel Masters naggunit og 2-6 nga baraha. (ESL)