CATARMAN, Northern Samar - Pulis nagpakamatay gamit ang iyang service firearm sud sa ka hotel ning lungsod niadtong Dominggo, Nobiyembre 3, 2019.
Giila ang biktima nga si Patrolman Wilard Castillo, 27, nadestino sa Personnel Holding and Accounting Unit (PHAU) sa Northern Samar Police Provincial Office (NSPPO).
Depression ang gituohang hinungdan sa pagpakamatay ni Castillo.
Base sa report sa kapulisan, ilang nadawat ang alarma pasado alas 6 sa gabii sa samang adlaw.
Ang kapulisan pinangulohan ni P/Staff Sergeant Ernesto Badocdoc dali nga miadto sa hotel nga nahimutang sa dan JP Rizal, eskina Quirino, sa lungsod.
Naabtan sa kapulisan si Castillo nga nagbuy-od ug naligo sa kaugalingong dugo.
Base sa inisyal nga imbestigasyon, nagpusil sa ulo ang pulis gamit ang iyang service firearm nga miresulta sa iyang hinanali nga kamatayon.
Dugang sa kapulisan nga nibutyag ang amahan ni Castillo nga bag-o lang gipaubos sa medical treatment ang pulis gumikan sa mental disorder.
Apan ang kapulisan niingon nga mohimo pa sila og lawom nga imbestigasyon bahin sa insidente.