DIRECTOR sa Philippine Drug Enforcement Agency 7 ug Police Regional Office 7 mihimakak nga pakyas ang administrasyon ni President Rodrigo Duterte sa iyang gubat batok sa illegal nga drugas tungod kay gihulagway nila kini nga malampuson bisan sa kalapad sa problema sa illegal nga drugas.
Una nang misaway si Vice President Lennie Robredo sa administrasyong Duterte sa war on drugs niini nga pakyas sa pagsulbad sa problema sa illegal nga drugas tungod sa mga palpak nga nasugatan sa kapulisan sama nalang sa aligasyon sa mga ninja cops.
Apan alang kang PDEA-7 director Wardley Getalla dili kini tinuod ug gani, matod niya, taas na kaayo sila og naabot kalabot sa pagtubag sa problema sa illegal nga drugas sa nasud.
Gipasabot hinuon niya nga kung ang hisgutan ang pagwagtang na sa maong problema kinahanglan kini’g taas nga panahon tungod sa kalapad na sa problema niini nga karon lang nila nakita sa dihang milingkod na sa katungdanan si Duterte.
Bisan gani ang America ug ubang nasud nga nag-una sa teknolohiya nag lisud pa sa paghunong sa problema sa illegal nga drugas tungod kay nagkinahanglan kini sa abag sa kadaghanan. “Kahit nga ang bansang America ay nahihirapan at iba pang mauunlad na bansa dahil ito ay talagang kailangan ng partisipasyon hindi lang sa government hindi lang sa mga law enforcers pati na ang community,” matod ni Getalla.
Si Police Brigadier General Valeriano de Leon, ang hepe sa Police Regional Office 7, miangkon na nga dako kaayo ang problema sa illegal nga drugas sa nasud.
Kini tungod kay apektado halos tanang ahensya sa gobyerno sama sa PNP, politiko ug ang mga tigpatuman sa balaod tungod sa kurapsyon nga maoy hinungdan nga nagkinahanglan pa silag laing lugway sa pagsulbad niini.
“To the surprise of everyone it has gone along way ang laki masyado ang affected, politicians, policemen, government in authorities na involved,” ni General De Leon pa.
Wala gilimod sa duha ka mga opisyal nga kung padayon nga dili mo kooperar ang katawhan sa ilang nasugdang kampanya maglisud sila niini apan ilang gipasalig nga sa katapusang termino sa presidente ila kining makab-ot. (AYB)