BUGTONG ang dakbayan sa Lapu-Lapu ang nag-inusarang nakadawat sa Seal Of Good Local Governance (SGLG) award gikan sa Department of Interior and Local Government (DILG) sa tanang mga Local Government Unit (LGU) sa tibuok Rehiyon 7.
Kini atol sa gipahigayong awarding ceremony sa DILG sa kaulohan nga may temang “SGLG ALL-IN: Sustaining the Gains of Local Good Governance.
Kauban nga napasidunggan sa dakbayan mao ang laing 56 ka mga LGU lukop nasod diin siyam niini gikan sa Visayas.
Ubos sa maong pasidungog kinahanglan nga ang usa ka LGU makapasar sa pito ka mga governance area sama sa Financial Administration, Disaster Preparedness, Social Protection, Peace and Order, Business Friendliness ug Competitiveness, Environment Management ug Tourism, Culture ug Arts.
Ang gihimong basehan sa giingon evaluation sa DILG mao ang pagpadagan sa usa ka LGU niadtong tuig 2018 kun panahon sa administrasyon ni kanhi Lapu-Lapu City Mayor Paz Radaza.
Apan gumikan kay si Radaza dili naman mao ang mayor karon sa dakbayan hayan si Lapu-Lapu City Mayor Junard “Ahong” Chan na maoy personal nga midawat sa SGLG marker ug Performance Challenge Fund gikan sa DILG.
Si Radaza mao na karon ang kasamtangang kongresista sa Lone district sa dakbayan. Ang kongresista mipadayag sa iyang kalipay nga nalakip ang dakbayan sa nakadawat sa award sa DILG.
Mas nakapahinungdanon sa maong award alang sa kongresista mao nga nag-inusara lang gayud ang dakbayan sa Rehiyon 7 nga nakadawat niini.
Alang sab ni Radaza nga nagpakita lang kini nga ubos sa iyang administrasyon kaniadto dihang siya pa ang mayor sa dakbayan nga maayo ang pagpadagan sa iyang pamunoan nga nakaagni og daghang mga investors ug pagsalig sa mga Oponganon.
Iyang gipasalamatan ang mga investors, konseho sa dakbayan, mga kapitan, department heads ug ang tanang Oponganon nga nakatampo sa pag-implementar sa mga proyekyto ug programa ubos sa iyang administrasyon diin nakaabot gayud kini sa grassroots level.
“This award is fruit of our hard work, all our efforts, and all our untiring love for public service in providing the best for all of us. Congratulations to all of us Oponganons and I thank you all for being instrumental in making my advocacy on good governance and good citizenship possible” matod ni Radaza. (GCM)