2 ka ‘libakera’ gidakop

DUHA ka mga babaye nga gipasanginlan nga nanglibak sa usa ka inahan sa group chat nalutsan og warrant of arrest sa kasong cyber libel.

Ang duha nasikop niadtong Lunes, alas 8:45 sa gabii, Nobiyembre 4, 2019, sa Barangay Sudlonon ug Barangay Gairan,Dakbayan sa Bogo.

Ang gipangdakop mao silang Mary Grace Catapan, 31, taga Barangay Sudlonon ug Jhallyn Gequillo Varga, 35, taga Barangay Gairan.

Ang warrant of arrest giluwatan ni Judge Ramon Daomilas Jr. sa Branch 11 sa Regional Trial Court (RTC) sa Siyudad sa Sugbo alang sa paglapas sa Section 4 (c) (4) sa Republic Act 10175 kun Cybercrime Prevention Act of 2012 nga mas naila nga Cyber Libel.

Ang korte mihatag og pagtugot nga makapyansa ang matag usa kanila og P36,000.

Matod sa nireklamo nga inahan nga maoy nikiha sa duha sa korte sa Siyudad sa Sugbo nga niadtong 2017, sa pribadong tunghaan sa iyang anak sa dakbayan sa Bogo, wa siya masayod nga siya na diay ang sumsuman sa libak sa pipila ka mga ginikanan sa group chat nga gihimo nilang Catapan ug Varga.

Sa group chat adunay 10 ka mga miyembro nga pulos mga ginikanan sa mga bata nga nagtungha sa wa niya gibutyag nga tunghaan sa siyudad sa Bogo.

Usa sa mga miyembro niini ni-screen shots sa tanang conversation pagpandaot sukad pa niadtong 2017 hangtod 2018 hinungdan nga iyang gipasaka ang kaso.

Matod ni Aileen (di niya tinuod nga ngalan tungod sa hangyo nga magpatago) nga usa sa iyang higala nga miyembro sa group chat sa mga ginikanan nipahibawo kaniya nga gidaot siya sa duha ka mga sinumbong.

Gihulagway ang panagway ni Aileen nga daw dagway sa usa ka ungo ug gipakita usab ang picture niini.

Gipasanginlan siya nga adunay sakit nga bipolar disorder.

Iyang kamanghurang anak gipakita ang dagway nga adunay caption nga special child nga nakapasakit niya pag ayo.

Gipasanginlan usab ang iyang bana nga usa ka huwes sa korte sa Central Visayas nga kawatan samtang gianggaan usab siyag Elsa droga nga nagpasabot nga tigpayuhot siyag illegal nga drugas sa dakbayan sa Bogo.

Matod niya nga gawas sa saway nga gisumsum sa sulod sa group chat, nihulga usab ang mga miyembro niini nga ipatokhang ug ipapatay siya sa mga pulis ug isulod sa septic tank.

“Ang among na discover nga group chat is almost two years nga group chat nga halos everyday ko nila libakon. Kay kon mag vacation mi, i-grab ang among pictures ibutang sa group chat unya i-malign. Nya naa pa toy giingon nga kabit ko. Basta dagha pa,” matod ni Aileen.

Human niya mabasa tanan ang pagpanglibak, wa na siya makaantos pa iya kining gipasakaan og kaso sa korte.

Dili lang silang Catapan ug Varga ang iyang gipasakaan og kaso, lakip na ang laing mga miyembro sa chat.

Gawas niya, aduna usab siyay magtiayon nipasaka usab og kaso batok kanila nga pending pa sa korte.

Tungod niini, matod niya angay nga patagmon ang maong mga ginikanan nga mipakauwaw bisan kon sulod ni sa usa ka group chat.

Mahimong mabilanggo sulod sa unom ka buwan ngadto sa duha ka tuig ug upat ka buwan ug momulta og P200 ngadto sa P6,000 ang silot kon mamatud-ang sad-an sa korte.

Related Stories

No stories found.
SunStar Publishing Inc.
www.sunstar.com.ph