IGO nalang sa paghapyod sa puthaw sa prisohan ug pangayo og pasaylo ang usa ka bana human nga maposasi sa mga pulis tungod giingong nangulata sa iyang asawa sa lungsod sa Dalaguete Martes, Nobiyembre 5, 2019.
Si Police Major Rolan Aliser, hepe sa Dalaguete police, miila sa ilang dinakpan nga si Florencio Yonto, 52, molopyo sa Barangay Dumalan sakop sa maong lungsod.
Matod ni Aliser nga ang asawa mismo ni Yonto nga si Guillerma Yonto mao'y nagpadakop sa iyang bana dihang nag-away ang managtiayon.
Nasayran nga gibutyag sa nagreklamo nga asawa sa mga pulis nga si Florencio giingong pirmi manapat sa iyang asawa panahon kon sila mag-away.
Nobiyembre 5, dihang suwayan unta siya sa pagpusil sa iyang bana, hinay nga misibat sa ilaha ang asawa ug dali-dali nga miadto sa istasyon sa pulis.
Si Aliser nagnayon nga daling gitubag sa iyang mga sakop ang reklamo sa asawa human nga miingon si Guillerma wala molakaw ang bana niini sa ilang balay.
Sa pagresponde sa mga pulis, naaktohan pa nga hawid sa suspek ang armas nga .357 revolver nga paingon pasulod sa iyang sling bag nga nakasabit kaniya.
Hinungdan nga gimanduan kini sa mga pulis sa pagbutang sa iyang armas sa ubos ug sipaon palayo kaniya dayon sang-at sa mga kamot sa taas.
Wala, matod pa, nagmagahi ang gidakop ug mingsunod sa mga pulis paingon sa istasyon sa kapulisan sa lungsod.
Narekober gikan kang Florencio ang armas nga dunay tulo ka bala. Ang dinakpan gibalhog sa Dalaguete Police Station. (BBT)