GITAKDANG magtunol og hinabang ang lokal nga kagamhanan sa dakbayan sa Cagayan de Oro ngadto na sa mga dapit nga apektado sa linog niadtong bulan sa Oktubre.
Aprobado na sa konseho ang P2 milyones nga kantidad nga ipamalit og mga tubig, pagkaon, ug uban pa alang sa mga nabiktima sa maong kalamidad.
Una na nga gibutyag usab ni City Administrator Teodoro Sabuga-a Jr. nga kuhaan og P100 ang madawat nga bonus sa matag empleyado sa City Hall.
Atol sa regular nga sesyon sa 19th City Council, nagpadangat og special report si Konsehal Girlie Balaba kalabot na sa sugyot nga paksian ang calamity fund sa dakbayan aron maoy ihatag ngadto sa mga biktima.
"In behalf of Cagayan de Oro, I would like to ask motion requesting our city mayor to utilize the portion of our calamity funds to help our brothers and sisters in the provinces and cities of North Cotabato, Sultan Kudarat, and Davao del Sur," matud ni Balaba.
Samtang nagsugyot usab si Konsehal Edgar Cabanlas nga aprobahan na dayon kini tungod kay dinalian kini nga panginahanglanon sa mga nabiktima ug gamay lang kini nga kantidad sa calamity fund sa dakbayan nga anaa sa kapin dos milyones.
"We have to allocate now using our emergency power subject to availability of funds which I think is always available. P2 million to buy for food, water, and kanang uban diha," dugang ni Cabanlas.