BUOT sa Department of Health (DOH) nga 95 porsento sa mga bata ang mabakunahan karong umaabot nga Nobyimbre 25 hangtod sa Disymebre 7 sa ipahigayong “Sabayang Patak Kontra Polio.”
Kini lakip sa kampanya nga mabatokan ang outbreak sa nasud human dunay nagpositibo sa poliovirus sa Mindanao ug Luzon.
Gibutyag ni Dr. Ian Christian Gonzales, infectious diseases cluster head, nga target niini nga kampanya nga mabakunahan ang daghan nga mga bata.
Kampante usab ang kadagkoan sa DOH nga makab-ot ang target nga mabakunahan ang mga kabataan.
"Medyo ang confidence sa tao sa vaccines gabalik napud. So in Manila na achieved man nila ang 95 percent. So we expect in Region 10 will get the same or even more," matud ni Gonzales.
Gidugang usab ni Gonzales nga paigo ang vaccine sa ubay-ubay ka ihap sa mga kabataan alang niining maong outbreak tungod kay lahi kini nga vaccine ug alang lamang sa poliovirus.
Gidugang pa niini nga dunay 30 porsento nga mga bata ang wala nakakumpleto sa ilang bakuna diha sa gipahigayong regular nga pagbakuna.
Nasayran nga gibisita na sa tinugyanan sa DOH ang mga balay tambalanan aron masuta kung dunay simbako nagpositibo niini nga kaso.
Padayon usab ang ilang mga regular nga immunization program aron dili na mokatap pa kining maong makapatay nga virus.
Gi-aghat ang tanang mga ginikanan nga pabakunahan ang ilang mga kabataan nga nag-edad og 5-anyos paubos.
Giingong kini nga outbreak response himuon kini sa DOH sa mga panimalay.
Duna nay gitukod nga Task Force kontra polio ang siyudad nga gipangulohan sa City Health kauban ang DOH, City Local Environment and Natural Resources Office, City hospital, Cagayan de Oro Police Office, Department of Interior and Local Government, ug uban pa.