TULO ka mga wanted persons ang nasikop sa otoridad human gisilbi ang mga warrant of arrest batok sa nagkadaiyang lungsod sa Misamis Oriental.
Gipangunahan ni Police Lieutenant Colonel Ariel Phillip Pontillas, hepe sa Gingoog City Police Station, ang pagsilbi sa warrant of arrest batok kang Joseph Lofranco Estrera, 22, taga Barangay Punong, Gingoog City.
Kasong carnapping ang giatubang sa suspek ug ang warrant giisyu ni Judge Giovanni Alfred H. Navarro, Presiding Judge sa Regional Trial Court-Northern Mindanao, Branch 27 ug adunay piyansa nga girekomendar nga P300,000.
Sunod nga nadakpan sa Gingoog Police Station mao si J-Anne P. Zaldariaga, minyo, taga P-2, Barangay 18-A, Gingoog City.
Nag-atubang kini og lima ka kaso nga may kalambigitan sa child abuse ug cybercrime.
Mokabat P6,000 ang girekomendar nga piyansa sa upat ka kaso samtang P120,000 sa laing usa.
Samtang laing wanted person pinasikad sa warrant of arrest ang nadakpan sa Liberty, Laguindingan, Misamis Oriental.
Giila ang dinakpan nga mao si Justine John Bagas Bonane, 20, residente sa dapit.
Hiniusang pwersa sa Laguindingan Police Station ug Criminal Investigation and Detection Group ang misilbi sa warrant of arrest niini may kalambitan sa kasong may kalambigitan sa pagpangabuso kon violence against women and their children.
Adunay P72,000 nga piyansa ang girekomendar bugti sa kagawasan niini.
Ang sunod-sunod nga operasyon sa kapolisan gitawag nga manhunt C kon Oplan Galugad.