WA MAN makuha ang top spot, apan mapasalamaton gihapon ang grupo sa Bocboc National High School Dance Troupe sa mga kasinatian ug pagtulun-an nga ilang napunit sa ilang biyahe sa Australia aron mosalmot og dance competition.
Ang grupo usa lamang sa gatusan nga nangandoy nga mailhan sa natad sa pagsayaw, naningkamot nga makab-ot ang damgo alang sa tagsa-tagsa nila ka miyembro.
Oktubre ning tuig, naangkon sa grupo ang second place sa World Supremacy Battlegrounds 2019.
Human sa maong kalampusan, mibiyahe na sab sila padung Brisbane aron moapil sa Domination World Championships.
Ang kompetisyon gihimo sa Sleeman Sports Complex, sa lugar, Nobyembre 2.
May lima kini ka dibisyon, ang Mini Crew, Minions Division, Mavericks Division, Main Division, ug Mammoth Division.
Sa Mavericks Division, mibansiwag ang watawat sa Pilipinas, nakapwesto ang Bocboc sa ikaduha.
Ubang midaug mao ang Hooligans sa Australia (1), Jesters (Aus) sa ikatulo, Pure Act Babies ug Casayaw sa Pilipinas nga nabutang sa ika-upat ug limang pwesto, misunod na ang Bang City (Aus), Damselz (Aus), Game Changerz (Aus) ug Da Biznez (Aus).
"Wala mi midaug mam, pero dili kabayran ang experience sa mga bata. Usa pa palangga sab kaayo mi sa mga Pinoy diri, sa among mga naadtuan nga lugar," saysay sa choreographer sa grupo nga si Rex Hart G. Valdez.
Sa Facebook chat interview kang Valdez, gisulti niini nga Miyerkules sa gabii ang ilang pag-abot sa Pilipinas.
Ang grupo gigiyahan ni Valdez kauban ang assistant choreographers nga sila Japhet Padrino ug Adonis Gabilagon. Samtang ang mga miyembro sa grupo mao sila John Carlo Garsula, Joemer Torayno, Iverson Lumahang, Allan Kim Labrador, Jomarie Valmorida, Ronald Valmorida, Princess Casancio, Kyla Angela Padillo ug Jeanney Rose Duarte.
Congrats!