SUPERBALITA DAVAO

Delos Reyes: Panahon sa pagtabang

Yanong Pagsabot

KUMUSTA sa atong mga higala? Affected ba mo sa pag tay-og nga nasinati sa isla sa Mindanao niadtong milabay nga semana? Sa akong bahin, kanunay lang nga daw nagalinog gihapon ang akong mabati, hinungdan nga mokalit ra sa paghunong ug moaninaw sa palibot nilabyog ba ang mga linya sa kuryente kay mao nalang ang akong basihanan kon linog ba gyod.

Grabe ang epekto sa pag tay-og dapit sa Davao del Sur ug North Cotabato diin ang mga molupyo gipabakwit sa ilang mga opisyales aron mas masayon ang paghatud sa mga hinabang. Kon kadaut ang hisgutan, lisud ihulagway ang kahimtang sa mga biktima nga nagpuyo sa mga evacuation centers ug maghugop pagsugat sa mga sakyanan nga moabot kay wa na silay gikaon ug tubig nga mainom.

Gawas sa mga biktima nga naa sa evacuation centers, duna pay daghan nga nabilin sa kabukiran kay dili buot mobiya sa ilang nabilin nga kabtangan ug mga kahayopan. Dili ikahibulong ug dili angay sawayon nganong nagsalig sila karon sa hinabang tungod nagpabilin pa ang kahadlok sa ilang pagbati kay sa mga balita nga atong nadawat daghan ang nakadungog sa tingog sa yuta dihang mibuka o miliki ang mga yuta ug nag landslide sab ang kabukiran.

Mas gipili sa kadaghanan nga diha na magpabilin sa mga tulda, sa mga payag nga gitukod bisan walay mga bong-bong kay sa mobalik sa ilang balay kay naghalok nga matabonan o di ba kaha lamyon sa pagliki sa yuta kay wa masayod ug walay maka tag-an kanus-a tay-ugon ang yuta sa linog.

Alang sa mga dili apektado, panahon kini nga atong itunol sa mga biktima ang atong mga hinabang madako man o gamay kay dunay daghang grupo ang moadawat sa mga hinabang aron ihatud sa mga natungdan. Apan angay sab magmatngon tungod sa panahon sa kalamidad dunay mga tawo nga mapahimuslanon, mosakay sa panahon.

Ang naka-apan kay malangan na hinuon ang paghatud sa mga hinabang sa mga organisasyon nga buot mohatud sa mga evacuation centers tungod mosugat ang mga tawo, mangatkat sa sakyanan ug manguha sa mga relief goods kay buot maneguro ug makabintaha sa uban, hinungdan nga magduha-duha na ang mga buot motabang.

Duna sab pipila nga mahadlok nga ipaagi sa mga ahensya sa gobyerno ang ilang tabang sama sa DSWD tungod sa nasinatian sa mga relief goods lang sa mga biktima sa Bagyong Yolanda nga daghan ang wa makaabot sa katawhan.

Nakadayeg ta sa grupo sa mga batan-on sa Calinan nga ilang gipanganlan og Adventist Youth Organization for Service AYOS, kay nangita'g pamaagi nga matigom ang ginagmay ug dinagko nga mga hinabang ug gihatud sa mga biktima didto sa Barangay Tacul, Magsaysay, Davao del Sur niadtong milabay nga Dominggo.

Sa ilang paningkamot, dunay natigom nga mga salapi nga ilang gipamalit ug pagkaon, de lata ug uban pang panginahanglanon apan ginaplano pa unsaon paghatud sa umaabot nga Dominggo nga unta dili maharang sa mga katawhan aron mahimong tunhay ang pagpang-apud-apod sa mga hinabang.

Sa tanang panahon, mahimo nato ang pagtabang kon atong gibati nga atong boluhaton ang pagtabang sa uban. Dili nagkinahanglan nga madatu ta aron makatabang sa uban, dili kinahanglan nga maghinubra ang atong nabatnan aron makahatag sa uban, kay ang paghatag nagagikan sa atong kasingkasing.

Tan-awa sa imong palibot kay mas daghan pa ang nanginahanglan nga mas lisod pa kanimo ang kahimtang.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph