DIGOS CITY -- Gisugdan na sa Digos City Police Office (DCPO) ang paghatag og mga relief goods sa mga biktima sa linog human grabeng naapektuhan ang mga molupyo sa Sitio Bandera, Barangay Balabag ug Barangay Mahayahay ning dakbayan niadtong Martes, Nobyembre 5, 2019.
Giawhag sab sa kapulisan kadtong mga buot mohatag og donasyon nga seguruhon ang tubig kay kini maoy importante sa mga bakwit.
Dako ang kalipay sa 150 ka mga indibiduwal nga nakadawat og mga bugas, noodles, tinapa ug mga tubig gikan sa DCPO.
Samtang gipasidan-an ni Police Lieutenant Colonel Ernesto Castillo, hepe sa DCPO, ang mga molupyo sa lugar nga di angayang mokompiyansa sanglit matag karon ug unya nasinati gihapon ang mga aftershocks.
Tungod sa sagunsong pagtay-og, daghan na sa mga yuta nga giagian sa fault line ang miliki mao nga delikado sab sa landslide ang mga bakilid nga bahin sa barangay.
Pipila sa mga molupyo ang na-trauma sa linog mao nga di una mobalik sa ilang gipuy-an.
Gipahimagnoan sab ni Castillo ang publiko nga di magpataka og post sa social media kon makahatag og panic sa katawhan. (Orlando B. Dinoy)