DAKPAN ang usa ka high-value target nga school principal alas 12:15 sa udto niadtong Martes, Nobyembre 5, 2019.
Giila ang suspek nga si Nasser Kali Tando, 54, principal sa Marimar Elementary School ug molupyo sa Barangay Poblacion 2 sa Parang, Maguindanao Province.
Gibutyag ni Parang Chief of Police Lieutenant Colonel Ibrahim Jambiran nga nagpahigayon sila og buy-bust operation sulod sa tulunghaan.
Nagpositibo sa test buy sa shabu sa police assets ang suspek, busa gilayon nilang gisulod ang principal sa iya mismong buhatan ug giposasan.
Nakuha gikan sa iyang posisyon ang upat ka dagkong pakite sa shabu, marked money ug mga drug paraphernalia.
Nasayran nga namaligya og shabu si Tando sulod mismo sa tulunghaan ug giingong sa Principal's Office pa niya sila mag-pot session.
Gibalhog na sa prisohan ang principal sa Parang Municipal Police Station ug gipasakaan na og kasong kalapasan sa Republic Act 9165 o Comprehensive Dangerous Drug Act of 2002.