ANG kasinatian sa usa ka 22-anyos nga Cebuana, kinsang mga hulagway nga nakahubo mikatap sa Facebook maoy magsilbing leksiyon sa mga kababayen-an nga mag-apil-apil anang mga malaw-ay nga binuhatan diha sa social media. Maka-ingon ta nga”mirisi.” Karon kay nauwaw naman siya sa iyang gihimo, mireklamo na siya ngadto sa anti-cyber crime division sa kapulisan.
Adunay nakaila ang maong babaye sa Facebook kinsa gustong makig-sex kaniya. Mihangyo nga maghubo siya ug duwa-duwaan ang pribadong parte sa iyang lawas. Misugot man pod ang babaye. Aw, sunod adlaw, mikatap na ang iyang nga hulagway sa iyang gihimo sa FB. Aber, kinsa man ang sad-an niini? Nganong misugot man siya sa maong hangyo? Kay gisaaran siyang bayran? O gumikan sa iyang pagkakuryuso o biga-biga lang gyud?
Dili kuno panguwarta kay maayo ang kahimtang sa mga ginikanan sa babaye kay seaman ang amahan. Aw, diay ba? Unya nganong nadani man siya? Pang-experience lang? Sus, nganong cyber sex man gyud nga naa may tawo gyud nga ma-partner? Walay uyab ang maong babaye? Kanang uyab nga mogakos ug mohalok kanino. Walay makalabaw sa init sa lawas. Unsa may makuha anang cyber sex?
Matod pa sa pagtuon kasagaran sa mga babaye nga molambigit aning cyber sex o cyber pornography ang kadtong mga pobre nga walay tarung trabaho nga gusto og easy money. Mao na nga milipang ang cyber pornography diin ang nga ginikanan mismo maoy migamit sa ilang kaugalingon nga mga anak bisan pa sa ilang linghod nga pangidaron aron lang makakuwarta.
Tan-awa nang mga ginikanan diha sa lungsod sa Cordova. Pila na ka mga ginikanan ug ang ilang mga inosenteng mga anak ang naronda ug nadakpan sa kapulisan gumikan sa ilang kalambigitan sa cyber pornography. Sa mga nasud sama sa Pilipinas nga daghan ang nga kabus ug timawa, mas daghan ang matang ning maong kaso. Kini gumikan sa kawad-on. Apan kon biga-biga lang, aw, mirisi. (bobbygnalzaro@gmail.com)