SA WALA damha, gidawat ni Vice President Leni Robredo ang tanyag ni President Rodrigo Duterte nga mahimong co-chairperson sa Inter-Agency Committee on Anti-Illegal Drugs (ICAD).
Sa press conference didto sa Quezon City Reception House, ang bise presidente miyagyag sa iyang paghangop sa posisyon.
“Ang pinakamahalagang konsiderasyon para sa akin ay simple lang: Kung ito ang pagkakataon para matigil ang patayan ng mga inosente at mapanagot ang kailangan managot, papasanin ko ito kaya tinatanggap ko ang trabahong ibinibigay sa akin ng Pangulo,” padayag ni Robredo sa mga reporters.
Kini dakong sukwahi sa unang pamahayag sa iyang spokesperson nga si Barry Gutierrez kinsa sa niaging adlawa mipasabot nga lisod kini dawaton kay dili seryuso si Duterte sa iyang tanyag. Wa usab kunoy mo-exist ang maong posisyon.
Matod ni Robredo nga sa higayon nga mosugod na siya sa iyang katungdanan, ang mga dagkong drug personalities ug mga dautang elemento sa kapulisan maoy iyang unang rumbohon ilabi na kadtong mga opisyal sa PNP nga nalambigit sa pag-recycle sa mga shabu.
Kon tinud-on ni Robredo kining iyang plano, alegre ni kay dili halayo ang posibilidad nga makakuha siya og simpatiya sa pipila usab ka mga PNP officials nga nasagmuyo tungod niining pabor-pabor nga pagtratar diha sa ilang kuwerpo.
Usa sa ehemplo niini mao ang daling pagka-abswelto sa administrative case ni General Oscar Albayalde sa iyang pagkalambigit sa ninja cops. Ang nahilom usab nga mga kaso ni kanhi Customs Collector Nicanor Faeldon kalabot sa binilyon nga shabu ug sa pagkakontrobersiya usab niini isip hepe sa Bureau of Corrections.
Ikaayuda unya ni Robredo sa iyang bag-ong tahas si PDEA chief Aaron Aquino kinsa usa sa mitestigo batok ni Albayalde? Suportahan gyud kaha ni Duterte si Robredo? Kini maoy atong atngan.