BUOT sa kongresman sa unang distrito sa siyudad sa Cagayan de Oro nga ipahuman ang usa sa mga proyekto niini nga nahugno niadtong Oktubre 5 sa hapon diha sa Barangay Bonbon, siyudad sa Cagayan de Oro.
Ang maong proyekto anaa sa kantidad nga P5.6 milyones ug anaa sa 80 porsyento pa lang ang natapos sa dihang kini nahugno.
Nagpagawas og pahayag si Kongresman Rolando "Klarex" Uy kalabot na sa maong panghitabo, kinsa miingong gikasubo kaayo niini ug ngayo og pagsabot sa katawhan ilabi na nga kini ang labing unang higayon nga dunay proyekto niini nga nahugno ubos usab sa desinyo sa Department of Public Works and Highways (DPWH).
Nasayran nga tulo ang samaran nga mga trabahante, kinsa nailang sila si Arjel Gallana, 22, Ronnie Miñoza, 26, ug Wilson Berja, 27, kinsa nagpaalim sa ospital.
Giingong nagtuo ang mga construction worker nga kini tungod sa sunod-sunod nga nahitabong linog diin nakasinati usab ang siyudad sa pagtay-og.