BAHA ug sunog na ang nalampasan sa lima ka tuig na nga binuhing iro nga ginganlan og "Tisoy" sa tag-iya niini.
Kagahapon, Nobyembre 6, dako ang kalipay ni Juliet Agustin, 51, dihang
nakita nga wala nalakip pagkasunog si "Tisoy" dihang niulbo ang kalayo sa Barangay Puntod sa siyudad sa Cagayan de Oro.
Gibutyag ni Agustin sa pakighinabi sa Superbalita Cagayan de Oro nga wala naapil pagkasunog ang maong iro bisan kong ang katunga sa nahimutang niini gilamoy na sa kalayo.
"Wala siya naunsa, mao nalang gyud diha ang wala nasunog. Swerte pa gyud siya. Buotan kaayo na nga iro," matud ni Agustin.
Matud ni Agustin nga survivor usab si Tisoy niadtong taas kaayo ang tubig baha sa siyudad, gani wala na siya nagdahum nga buhi pa kini tungod kay nakahikot man niadtong higayona.
"Buhi gihapon siya naglangoylangoy siya. Didto siya sa kalsada natulog. Niuli dayon diri. Swerte gyud si Tisoy," dugang ni Agustin.
Naghilak na lang si Agustin dihang dali nga nipauli sa ilang balay dihang human nabalitaan nga dunay sunog sa ilang dapit ug lakip ang iyang panimalay.
Gikabutyag niini nga iyang gidala ang anak nga 8 anyos sa ospital apan wala na gani kini nakapalit og tambal tungod kay nagdali sa pagpauli.
"Ako man ning gidala sa doktor ganina kay naa lage nanghubag sa iyang ilong, unya nahadlok ko ba basig di ka ginhawa. Mao lage ni wa pa gani ko kapalit sa resita," matud ni Agustin.
Nipasalig usab ang opisyal sa Barangay Puntod nga andam ang ilang hinabang alang sa mga nabiktima sa sunog.
Nasayran nga mga anaa sa dili moubos sa pulo ka mga balay ang naugdaw.
Gideklarang fire out ang maong insidente mga alas 12:18 sa udto.