GIKUMPIRMAR ni Misamis Oriental Governor Bambi Emano nga magpadala ang kagamhanan sa probinsya og ayuda ngadto sa mga biktima sa linog sa North Cotabato.
Samtang out-of-town si Emano, gitahasan niini si Matt Vallesser, kinsa head sa Provincial General Services Office (PGSO), nga maoy molihok niini aron daling mapaabot ang tabang pinansyal ug suplay.
Matud ni Valleser sa Superbalita Cagayan de Oro nga aduna pa silay coordinative meeting kauban ang mga ulo sa departamento aron maplano ang mga ipadala sa mga biktima sa linog.
Kahinumduman, dili tiaw ang mihapak nga trahedya sa North Cotabato dihang sunod-sunod ang pagtay-og nga nasinatian sa dapit.
Adunay mga nakalas nga kinabuhi ug daghan puloy-anan ang nangaguba.