USA sa mga gitutokan sa Bureau of Fire Protection (BFP) ang giingong napasagdan nga nilung-ag rason sa pag-ulbo sa sunog niadtong Nobiyembre 5 mga alas 6:14 sa Baryo Ngitngit, Zone-6, Gumamela Extension, Barangay Carmen, siyudad sa Cagayan de Oro.
Anaa sa usa ka milyon ang natalang damyos sa sunog ug gideklara kining fire out mga alas 8:30 sa gabii nga niabot kini sa ika-upat nga alarma.
Mokabat ngadto sa 66 ka mga pamilya ang apektado sa maong sunog ug 217 ka mga indibidwal diin anaa sa mga 40 kapin ka balay ang gilamoy sa kalayo.
Sa pakighinabi kang Senior Fire Officer 4 Samson Velarde, hepe sa fire station sa Carmen, nga usa sa ilang gitutokan ang gitaho sa mga silingan nga nabiyaan nga nilung-ag ang hinungdan sa maong sunog, apan tanan nga gisuspetsahan ilang tutokan.
"As to the cause of fire, still under investigation pa ta but isa na sa mga anggulo nga atong gitutokan karun sa investigation," matud ni Velarde.
Wala usab nila giwala ang anggulo nga posibleng tungod sa kuryente human nga nawala ang kuryente sa wala pa nahitabo ang sunog.
Sa insiyal usab dunay napaso atol sa panghitabo.
Giangkon sa BFP nga naglisod sila sa pagpakgang sa kalayo tungod na usab sa kalisod sa dalan sa maong dapit.
Atol sa maong sunog, nakitang magtinabangay na lang ang mga residente pagpakgang sa kalayo pinaagi sa pagpasa-pasa sa baldeng tubig ug gibubo sa kalayo nga mga panimalay.
"Being a first responder, maingon nato nga naa gyud sa kalisod kay tungod sa kalisod sa agianan, gidut-an gyud nato og maayo nga dali unta nato mapalong but tungod sa dako nga volume sa fire, nahurot atong tubig unya naa pa gihapon nagpabilin nga kalayo," matud ni Velarde.
Gidugang pa usab niini nga gani nagpaabot na lang sila og laing mga fire truck.
"Ang nahitabo gi-safety na lang nato atong truck sa unahan daw nagpaabot ta nga naay laing fire truck maabot kay wala may kagawasan ang atong fire truck so ato pong gi safety nga dili pud siya maapil sa maong sunog," dugang niya.