TUBOD, Lanao del Norte -- Patay ang usa ka tricycle driver human gipusil sa wala mailang mga suspetsado Nobiyembre 5, 2019 mga alas 7:40 sa gabii sa Limuag Kalilangan, Lungsod sa Tubod, Lanao del Norte.
Giila ang biktima nga mao si Constituto E. Caputol, 48, minyo, residente sa dapit.
Sa inisyal nga imbestigasyon sa kapolisan sa Tubod Police Station, nasuta nga anaa sa sala sulod sa panimalay niini si Caputol ug nanan-aw sa paboritong programa niini sa telibisyon, dihang kalit lang misulod ang wala mailang suspetsado ug gipusil kini makaduha ka higayon nga maoy hinungdan nga dead on the spot sulod sa panimalay ang biktima.
Yano lang sab dayon misibat ang suspetsado human sa insidente.
Padayon pa nga gisuta sa kapolisan ang motibo sa pagpatay niini karon panahona ug unsay kalambigitan niini.