KANHI Talisay City mayor ug karon konsehal Socrates Fernandez giisip nga lain lang hagit sa ilang pamilya ang gipakanaug nga desisyon sa Sandiganbayan batok kaniya.
Diin pagkombikto kaniya sa kasong obstruction of justice diin adunay penalty nga perpetual disqualification sa paghupot og posisyon sa gobyerno.
Gipakagamay lang ni konsehal Socrates Fernandez ang gipakanaug nga desisyon sa Sandiganbayan niadtong Oktubre 25, batok kaniya.
Sukad nigawas ang maong taho sa miagi nga semana, si Fernandez ang niatubang karon lang niatubang sa mga sakop sa media, Myerkules sa buntag, Nobyembre 6, human naatlan kini nga nitambong sa usa ka kalihukan sud sa Talisay City hall.
Matud niya, ang panghitabo mas nakapalig-on pa kini sa relasyon sa ilang pamilya.
Apan iya usab giklaro nga nanghinaot gihapon siya nga dunggon sa sandiganbayan ang ilang giduso na nga motion for reconsideration niadtong Lunes, Nobyembre 4.
Andam ang iyang kampo nga ipasaka sa higher court ang maong kaso kun di gihapon pamation ang iyang habig.
Kahinumduman, gikombikto si Fernandez sa gipakanaug nga desisyon sa Sandiganbayan sa kasong obstruction of justice kalabot sa warrantless arrest sa anak niini nga si Joavan Fernandez.
Ang maong kaso ang gipasaka sa Cebu Provincial Police Office batok kaniya niadtong 2010, human iyang gikuha ang bag sa sakyanan ni Joavan nga gikustodiya sa pulis.
“Atong pamilya mao man gihapon, intact ang tinagdanay, pagtinabangay, pag-ampo. Si Joavan nakasabot sad siya sa giingon nato nga process of law. Nasuwat na sa balaang kasulatan nga kada adlaw duna kitay tagsa-tagsa ka suliran, mga pagsuway, ato ng dawaton uban ang pagsalig nga naay makagagahum..,” saysay ni Fernandez. (FMD)