“Mga produktong baboy nga nasagol sa mga produktong positibo sa ASF virus pugngan na sa pagsulod sa Sugbo”.
Mipagawas og bag-ong kamandoan si Gobernador Gwendolyn Garcia kalabot sa pag-ipon sa mga produktong baboy sa usa ka cold storage nga posibleng nataptan sa kagaw sa ubang produkto nga nagpositibo sa African Swine Fever (ASF).
Giisyu ni Garcia ang Executive Order (EO) 23 Miyerkules sa gabii, Nobiyembre 6, 2019.
Ang EO 23 nagdili na sa pagsulod sa Sugbo sa mga produkto sa baboy, isda o karne sa baka nga nasagol sa mga produkto gikan sa Luzon.
Ang National Meat Inspection Service (NMIS) 7 kauban ang Department of Agriculture (DA) 7 maoy mususi kon nasagol ba ang mga produkto nga paingon sa Sugbo sa mga produkto nga gikan sa Luzon ug positibo usab sa ASF.
Ang mga produkto nga nahisgutan mamahimo gihapon nga makasulod sa ganghaan sa Sugbo basta kompleto kini sa mga rekisitos sama sa sanitary ug phytosanitary permits, import clearance o veterinary quarantine clearance gikan sa Bureau of Animal Industry (BAI).
Samtang ang mga produkto nga gikan sa Luzon padayong gidid-an sa pagsulod sa Sugbo gawas kon ang gisudlan nga van sa maong mga produkto wa gyud maablihi pag-agi sa kauluhan isip paglikay sa pagtapot sa kagaw sa mga produkto.
Miisyu og lima ka EOs si Garcia kabahin sa pagpugong sa mga produktong baboy gikan sa Luzon sa pagsulod sa Sugbo.
Nobiyembre 4, 2019, gilugwayan ni Garcia ang ban gumikan kay nakita niya nga wala pa mulurang ang pagkatap sa ASF virus sa kauluhan.
Gilugwayan ang ban kutob na Hunyo 30, 2020.
Matod sa gobernador nga sa sunod-sunod usab nga pagpositibo sa resulta sa laboratory tests sa mga produktong baboy mas desidido siya sa paghatag ug mas hugot nga kamandoan kalabot niini.