DAGKONG bawod mao ang nakaingon sa pagkalunod sa MV Siargao Princess sa buntag sa Huwebes, Nobiyembre 7, samtang naglawig gikan sa Loon, Bohol paingon unta sa Sibonga, habagatang Sugbo.
Luwas ang tanang 63 nga sakay sa fastcraft, 56 pasahero ug pito ang mga tripolante.
Nadawat sa Coast Guard District Central Visayas ang distress call gikan sa usa sa mga pasahero alas 11:15 sa buntag. Nakabiya ang fastcraft sa pantalan sa Loon alas 9:30 sa buntag.
Matod sa tigpamaba sa CG District Central Visayas Lieutenant Junior Grade Michael John Encina nga nasalbar nila sa ilang barko nga MRRV 4406 BRP Suluan ang 60 ka mga pasahero ug tripolante.
Tulo sa mga pasahero nanglangoy ug gidagsa sa baybayon sa Dakbayan sa Carcar.
Ang nalunoran sa barko gibanabanang dunay mga siyam ka kilometro ang gilay-on gikan sa baybayon.
Sa pagsuwat ning taho, wa pa makuha sa Superbalita Cebu ang mga ngan sa tulo.
Matod ni Encina, nagpadala dayon sila sa ilang Special Operations Group, inubanan sa mga diver ug medical team.
Nagkig-alayon usab sila sa nagkadaiyang disaster team sa mga munisipyo nga duol sa nahitaboan.
Usa ang Armed Forces of the Philippine Central Command nga ilang giduol alang sa aerial survey aron mas madali ang rescue operation.
Sa inisyal nga taho, nalunod ang fastcraft tungod kay nasudlan og tubig tungod sa dagkong bawod.
Matod sa mga pasahero nga dakong tabang ang gihimo ni Petty Officer 3rd Class Ralph Barajan sa PCG kinsa lakip sa pasahero hinungdan nga silang tanan luwas. Si Barajan naka-off duty niadtong higayona.
Matod ni Encina nga dakong tabang ang gihimong instructions ni Barajan sa mga pasahero hinungdan nga paspas ang rescue operation.
Wa’y giisyu nga gale warning ang Philippine Atmospheric Geophyscal Astronomical Administration (Pagasa) kagahapon.
Kon ipaubos sa Pagasa ang probinsiya sa gale warning, di na mamahimo nga mobiyahe ang mga sakyanang pangdagat nga anaa sa 250 gross tonnage ang gidak-on ug paubos.
Si Antonio Conag, kapitan sa fastcraft, gitambagan sa CG nga mosumiter og marine protest ngadto sa Maritime Authority Industry (Marina) 7.
Sa interbyu sa Superbalita Cebu, si Conag niingon nga naukab ang takob sa bodega tungod sa kakusog sa mga hapak sa bawod hinungdan nga nakasulod ang tubig.
Iya dayon nga gipahibawo ang mga pasahero.
Matod niya nga kon wa pa siya modeklarar dayon og “abandon ship,” hayan dunay kinabuhi nga nakalas.
Si Conag niingon nga dunay pasahero nga wa maapil sa lista.
Sa talaan sa PCG duna lay 54 ka mga pasahero, apan si Conag niingon nga 54 ang naa sa talaang pasahero, duha ang undeclared nga “friends, pito ang mga tripolante.
Iya sa Virgin Island Princess Shipping ang barko. Samtang moumol usab og Board of Marine Inquiry ang PCG 7 aron mohimo og pakisusi sa hitabo.
Aduna’y kapasidad ang MV Siargao Princess nga 120 ka tawo diin nagsugod ang operasyon niadto lang Oktubre.