DILI diay mapangutana kining Department of Interior and Local Government (DILG) kalabut sa barahan nga ilang gigamit sa paghukom kon gi-unsa pagtuman sa local government units (LGUs) ang kasugoan ni Presidente Rodrigo Duterte sa paglimpiyo sa kadalanan ug asiras? Mihulga man gud si DILG Assistant Secetary RJ Echiverri nga mahimong taralon sa hukaman si Cebu Governor Gwendolyn Garcia sa pagpangutana niini kon unsa ang parameters nga ilang gigamit sa paghatag og grado sa trabaho sa mga opisyal sa local government. Nakalapas na ba diay sa balaud ang pagpangutana sa DILG? Ingon na gyud sila niini ka infallible kon dili na sila pwedeng masayup ?
Nahibung man gud si Gob. Gwen ug ang ubang mga mayor sa Sugbo kay human gayud sa 60 diyas nga deadline nga gihatag si DILG Undersecretary Epimaco Densing III mibisita man sa Sugbo ug nagpahibawo nga natagbaw siya sa gihimo sa Cebu City, Mandaue City ug Lapu-Lapu City ug ubang mga dapit apan ang DILG Regional office daw lahi man ang panan-aw. Naa man gani pito ka mga lungsod sa Sugbo nga nahagbong sa ilang evaluation. Nakapangutana ang gobernador tungod kay nagtuo siya nga pasado man unta ang gihimo sa tanang mga kalungsuran ug mga component cities bisan kon ang uban naa pay wa mahuman paghawan.
Ang gihimo unta sa DILG mao ang pagsuroy na sa naglainlaing mga dapit, sa wa pa muabot ang deadline, aron tan-awon kon maayo ba ang trabaho sa mga LGU kay kon dili kini mao ilang maabagan aron mahusto. Ang nakadaut gud sa atong mga tinugyanan sa gobiyerno kay mas gusto nilang mangitag sayop kaysa tabangan ang ang mga LGU aron unta dili masayop. Wala man untay daghang trabaho kining DILG gawas sa pagsige og himo og seminar o ba kaha sa pagpatuman sa suspension sa mga opisyal nga makasala.
•••
Nganong nadugay man sa paghukom ang Local Water Utilities Administration (LWUA) kalabut sa kontrobersiya nga naghamok sa Metropolitan Cebu Water District (MCWD). Human gitangtang ni Mayor Edgardo Labella ang mga board of directors sa maong water district nagdumili pagkanaug ang mga sakop niini hangtud nga mi-resign ang chairman nga si Joel Mari Yu ug ang general manager nga si Jose Eugenio Singson, Jr.
Apan ang ubang mga sakop nagmagahi ug wala manganaug. Tungod niini nagtudlo og ilang mga opisyal ang LWUA aron temporaryong molingkud sa board samtang wala pa nila madesisyoni ang maong kaso. Unsa may nadugayan sa LWUA? Abi to nako og madali lang ang desisyon nila sa maong kaso kay sumala ni Mayor Labella nga uyon si LWUA Administrator Jeci A. Lapus sa pagtangtang sa MCWD board members.
Kinahanglan gayud nga makatudlo na og bag-ong board members aron mapaspasan na ang pagpangita og mga tinubdan sa tubig. Sa pagka-karon naay bag-ong mga wells nga gikawot ingon man, sumala sa report, dunay napirmahan nga memorandum of agreement ang MCWD ug usa ka supplier og tubig sa dagat nga de-salinated. Ambut og dawaton ba kini sa bag-ong MCWD board? (mannyrabacal1144@gmail.com)